WILLEMSTAD – Korte Supremo a destruí e sentensia di Korte den Apelashon di dia 18 di novèmber 2021, den e kaso di ekspropiashon ‘Troya’ kontra dje hòmber kondená Jose Luis de Andrade. A manda e kaso bèk Kòrsou pa Korte trata kompletamente di nobo.

Den e kaso di Rosaura Asuaje sí e sentensia a keda para. E huesnan di Hulanda no ta mira motibu pa destruí su sentensia. E desishonnan di Korte Supremo ta igual ku e konklushon di e Abogado General di Hulanda. Ta trata akí di e kaso yamá ‘kaso Monterrey’ den boka di pueblo, kaminda sospechosonan tabata usa kompanianan di Kòrsou pa kambia bolívar pa dòler pa medio dje fenómeno ‘swiping’.

Korte den Apelashon na 2021 a konfirmá e sentensia di Korte di Promé Instansia di 27 di sèptèmber 2019 den kaso di ámbos. Den kaso di Asuaje esaki a nifiká ku Korte a stipulá e plaka ku mester ekspropiá for di dje na 509.280,17 florin. E lo mester paga esaki, kitando e suma ku benta di un aparamentu di dje a generá. Asuaje a gana e plaka kambiando bolívar colombiano den dòler merikano via ‘swiping’. Pero el a bai keha na Korte Supremo ku Korte den Apelashon a rechasá e defensa ku no por a usa su deklarashon duná na polis pa kalkulá e suma ku el a risibí ilegalmente. Segun Korte Supremo e motibu akí no ta resultá den un eksitoso apelashon den kasashon. E huesnan di Hulanda no tin nodi di motivá e desishon akí. Ku otro palabra, Asuaje sí tin ku paga e suma.

Den kaso di De Andrade a stipulá e suma na 4.491.130,57 florin, poniendo komo kondishon tambe ku si e no paga e suma, e lo mester sinta 3 aña adishonal di prizòn riba loke el a risibí kaba pa e delitonan ku el a kometé. Den su kaso sí Korte Supremo di Hulanda ta haña ku Korte den Apelashon di Karibe a faya. De Andrade a keha kontra e konsiderashon di Hof ku el a gana e plaka ilegalmente basá riba 3 delito probá, miéntras e periodo den kua segun hof el a kometé e delitonan akí ta mas kòrtiku ku e periodo den kua el a risibí e plaka. Korte Supremo ta di akuerdo kuné i a mustra riba tur loke e Abogado General a bisa den su konklushon bou di puntonan 8 te ku 12.

Segun e Abogado General, a kondená De Andrade pa diferente krímen, inkluyendo labamentu di plaka i na mes momentu Korte a tuma un desishon tambe den e kaso di ekspropiashon, riba petishon di Ministerio Públiko (OM). Segun Korte durante 2011 pa 2015 el a risibí un komishon di 4.985.778,14 dòler komo agente di un kompania, kambiando bolívar venezolano pa medio dje fenómeno ‘swaip’, òf ‘turismo di dòler’, den dòler di hopi mas balor.

De Andrade a apelá e sentensia. Su abogado a argumentá ku e sentensia di ekspropiashon no por keda para, pasó De Andrade su entrada no a subi debí na e krímennan di labamentu di plaka ku a konden’é p’e. Korte a rechasá e argumentu akí i a afirmá ku por konsiderá e aktonan di labamentu di plaka probá, komo delitonan determinante pa kua a laba e ganashi. A kalkulá e suma risibí komo benefisio ilegal basá riba e suma stipulá den e kaso penal, komo e suma ku De Andrade a laba di 2011 pa 2015. Korte a determiná ku el a generá un entrada di 142.450.804 dòler ku e krímennan di labamentu di plaka.

Sinembargo, e periodo di tempu establesé den e kaso penal ta kubri un periodo mas kòrtiku. Apesar di esaki, Korte a mantené e desishon ku De Andrade a laba plaka ilegal, kumprando por ehèmpel un kas. Sinembargo e diskrepansia entre e periodo di tempu durante kua e labamentu di plaka a tuma lugá i e periodo konsiderá pa konfiskashon, ta kousa ku Korte den Apelashon no a motivá sufisientemente dikon ta rechasá e argumentu di e defensa di De Andrade. Porlotantu a destruí e sentensia di Korte den Apelashon i manda e kaso bèk pa tratamentu kompletamente di nobo, pa yega na un desishon nobo i bon motivá.