WILLEMSTAD—- Fiskal di Ministerio Públiko a hasi un petishon di búskeda di e sospechoso Taysharino Capistrano Schermer di 42 aña di edat nase na Kòrsou pa un kantidat di droga ku a ser konfiská durante entrada hudisial na un adrès den John de Poolstraat.

Relashoná ku un investigashon penal ku tabata keda realisá dor di e Divishon di Krímen Organisá relashoná ku violashon di lei di opio, djárason 20 di sèptèmber 2023 den oranan di mainta, a tene entrada hudisial na un adrès den John de Poolstraat. Durante di e entrada hudisial aki polis a bin topa un total di 58 papel di korant doblá konteniendo pipanan di plèstik ku kokaina i sèn skondé mei-mei di blòknan. A konfiská tambe un kantidat di plaka kèsh tantu na dòler komo euro. Enkonkeshon ku esaki, polis a detené e siguiente sospechosonan: Ø E dama S.V.S di 65 aña di edat i e hòmbernan: Ø U.M.S. di 39 aña di edat; Ø R.R.S. di 41 aña di edat; Ø Q.R.V.M. di 15 aña di edat, tur kuater nasé na Kòrsou. Despues di nan detenshon, tur kuater sospechoso a keda presentá dilanti di un fiskal ouksiliar, ku a ordená nan enkarselamentu pendiente di mas investigashon.

Durante interogashon ku a sigui e nòmber di e sospechoso Taysharino Capistrano Schermer di 42 aña a ser menshoná ku mester sa mas di e droga ku a ser konfiská na e kas den John De Poolstraat. Mesora Fiskal di Ministerio Pubikoa emiti un komunikado unda ta buska e sospechoso.  Kontinuando ku investigashon relashoná ku buskedá di  e  sospechoso Schermer, ayera djaluna 16 di òktober 2023, alrededor di 12.15’or riba òrdu di Fiskal di Ministerio Públiko, polis a hasi detenshon di Taysharino Capistrano Schermer di 42 aña di edat nase na Kòrsou. E detenshon ariba menshoná a tuma luga na warda di reshèrshi na Kaya Jose”Jo” Pinedoe kaminda e sospechoso a bai entregá su mes. Ku esaki e petishon pa búskeda di e sospechoso ta kanselá. A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.