Ta trata di e kaso di sekuestro kua  tuma lugá yanüari último na Veeris.

Willemstad—– Outoridatnan enkargá ku  e  investigashon kaso di sekuestro riba e komersiante  ku a tuma lugá den luna di yanüari último a realisá otro aresto mas.

For di dia ku e kaso di sekuestro a tuma lugá dia 10 di yanüari 2023 na Veeris unda tres tipo armá mester a yega i a kue un komersiante bai kuné, e mesun dia ya a e tim investigativo  di e Divishon  di Krímennan Organisá tabata na altura ken ta esun ku a presentá mas despues serka  famia di e komersiante ku tabata sekuestrá  pa asina tuma e plaka pa e sekuestradónan. A lag’é plenamente den libertat pa asina por a sigui su pasonan. Ora ku outoridatnan tabatin e informashon ku e sospechoso aki tabatin e intenshon pa bandoná Kòrsou a bai para na Hato ward’é  pa asina por a realisá su detenshon. Tabata manera ku e sospechoso a presentá   na Hato e la keda detené i mesora a bai na su kas den e bario di Kwartier na unda a kuminsá ku un listramentu  formal. E listramentu a kuminsá for di den oranan di mèrdia i a bai terminá te den lat di atardi unda a konfiská un kantidat di artíkulo ku ta di importansia pa ku e investigashon. Durante e listramentu a buska tantu paden komo pafó den kura di kas. Pa ku e kaso di sekuestro aki te ainda tin un grupo detené,  miéntras e komersiante mes ku a wòrdu sekuestrá tambe ta detené pero pa un otro kaso di eksportashon di droga via di kònteiner.  Investigashon ta kontinuá i no ta ekskluí ku lo bai tin mas detenshon pa e mesun kaso aki.