Willemstad—- E dos akusadonan a splika den korte ku nan no ta envolví den niun kaso di trafikashon di hende.

Fiskal a mustra ku e akusado Sterling durante di e interogashon a duna diferente deklarashon. Den kaso di Manzana e la kuminsá papia pero despues a stòp. Steriling a splika den korte ku enbèrdat e tabatin kombersashon ku  e mama di e yu ku nan a bin Kòrsou kuné i asta a bisa ku aki ta trata di kasonan doloroso pero un dia ku e topa ku e yu lo e bin kuné si. Ayera den korte Sterling a splika ku nan a bai pa buska piska i ora nan a yega na e boto un hòmber deskonosí ku máskara bisti a ordená nan pa bai ku e yu. A surgi asta un diskushon riba laman pero nan no por a hasi nada ya ku nan a sinti nan menasa. Fiskal a mustra ku e Sterling a yega di bisa ku ora nan a yega na e boto esnan riba e boto mester a tira  mucha nan laman i e na su turno a bula na awa i a reskatá esaki his’é pone riba nan boto. Manzana tambe mester a deklará ku nan a haña e mucha den laman despues ku probablemente esaki mester a kai na awa. Nan a kue mucha bin tera kuné pero no por a yama pidi asistensia debí ku e radio di e boto  no tabata funshoná. E dos piskadónan a bisa ku na niun momento nan  no a bisa e mucha bula nan laman i pa landa yega tera. Fiskal si  a splika ku ta e mucha mes a deklará ku na Venezuela un mardugá e tabata drumi ora su wela a lant’é i dun’é un tas pretu pa despues un deskonosí den un pikòp pretu a bin busk’é i a bai kuné. E hòmber aki a entreque den man di un otro hòmber ku a subi un boto blanku kuné. Asina nan  sali for di Venezuela i a subi laman grandi. E damita a sigui splika ku e mester a bira malu riba e boto i a kuminsá saka pa despues bai drumi. Dado momento e la wòrdu lanta i e mester a baha for di e boto blanku pa asina subi un boto blou ku dos hòmber riba dje. E damita a deskribí e dos hòmbernan i tambe ken tabata stür e boto ku tabata Sterling. Nabegando asta a splik’é ku nan lo hib’é pa su mama i ku tambe e por hinka nan den basta problema sin nan wòrdu gara. Dado momento nan a bisé pa bula na awa pa asina e landa yega tera ya ku nan tabata wòrdu pèrsigui pa Warda Kosta. Segun e damita  e la bisa e dos hòmbernan riba e boto ku kosta tabata muchu leu pa e landa yega i nan a bisé bula na awa i keda  landa den banda di e boto ya asina Warda Kosta no ta mir’é. Ta trata di un damita ku tabatin operashon na su kurason i asina mes a hañ’é ta bula den laman pero a ser reskatá pa e personal di warda kosta.