Victor tabatin kuater akusashon den su kontra i tur kuater ta trata di ladronisia di Kia Rio.

Willemstad— E  Hòmber J.E.L. VICTOR ( 1978) tabatin kuater akusashon den su kontra kual tur ta ladronisia i òf enkubrimentu di Kia Rio.

Victor ta wòrdu akusá ku e òf huntu ku otronan riba dia 27 di mei lo mester a hòrta i òf enkubrí un vehíkulo di e marka Kia Rio numerá N\ 58-60. Victor ta wòrdu akusá ku riba dia 18 yüni 2023 e so òf huntu ku otronan mester  hòrta i òf kita piesanan for di un vehíkulo di e marka Kia Rio numerá N\ 58-22. Victor  tambe ta wòrdu akusá ku riba dia 18 yüni pa 11 yüli 2023  e so òf huntu ku otronan sea mester a hòrta i òf enkubrí un vehíkulo di e marka Kia Rio numerá N\61-68. Por último Victor ta wòrdu akusá ku riba dia 2 di yüli 2023 e so òf huntu ku otronan mester a sea hòrta i òf enkubrí un vehíkulo di e marka Kia Rio numerá N\95-21. Fiskal a mustra ku den un periodo kòrtiku a hòrta vários vehíkulo di e marka Kia Rio. Segun Fiskal no por trata e kaso ainda den su kontenido mirando ku tin mas investigashon ku mester tuma lugá. Segun Fiskal e investigashon mas importante ta ku mester bai analisá un telefon ku a wòrdu konfiská den sel di e akusado. For di e telefon aki por a mira kon e akusado tabatin kontakto ku su pareha unda ainda e tabata duna indikashon pa bende piesanan hòrta ku e mester tabatin warda. Esaki a pone ku Polis a detené e dama pareha di e akusado tambe kual a wòrdu aki tambe ta sera pa e mesun akusashonnan aki.  E akusado a splika den korte ku no ta bayendo bon kuné den SDKK mirando ku e la haña un ataka kual a pone ku su man reks a keda poko lam i tambe e no por mira bon ku e wowo robes. Tambe e akusado a pidi pa e por bai kas mirando ku su pareha tambe ta sera i nan yunan ta sinta nan falta kual a pone ku asta a kuminsá bai hopi malu na skol. Fiskal mesora a indiká ku e ta haña ku e akusado su aresto no por wòrdu di skors mirando ku ainda mester hasi mas investigashon den kaso di e dos sospechosonan. E akusado a sigui splika ku e yunan ta kedando na wela di e i tambe su pareha. Tambe Fiskal a mustra ku  kier un rapòrt di tantu reklasering komo di un sikólogo pero mas amplio.  Hues a tuma desishon mesora i a indiká na e akusado ku e tin ku keda sera debí ku tin sufisiente indikashon ku e akusado sa algu di loke e ta wòrdu akusá di dje.  Hues a mustra ku no tin sufisiente motibu pa su aresto keda di skors. Hues a splika e akusado ku ainda no tin un fecha fiho pa su kaso wòrdu trata pero si lo posponé e kaso pa un máksimo di 4 luna i na momento ku haña un fecha pa e kaso wòrdu trata den su kontenido lo pone e akusado di esaki na altura.