Willemstad—-Djaluna 6 di mei 2024 alrededor di 23.45’or, Sentral di Polis a haña notifikashon ku un hòmber tabata maltratá su pareha den Kaya Madi.

Na yegada polis el a topa ku un dama ku a deklará ku un ratu promé e tabatin un pleitu ku su pareha i esaki lo a maltrat’é.

E hòmber a dal e dama un wanta i despues kue su telefòn bai kuné for di e sitio. Polis a detené e hòmber B.N.G. di 41 aña di edat nasé na Kòrsou, pa e maltrato i ladronisia ariba menshoná.

Detenshon di e hòmber a tuma lugá na su kas den Indigostraat. A presentá e sospechoso dilanti un fiskal ouksiliar ku a ordená su enkarselamentu pendiente di mas investigashon.