WILLEMSTAD,– Despues di un total di 4 dia di tratamentunan penal den kaso Tiger por nota ku un dje hòmbernan tabata será pòrnada pa mas ku 6 luna.

Ta trata di e hòmber ku inisial U.E. Outoridatnan ta sospechá e hòmber di ta kómplise di un ladronisia di droga riba 23 di aprel 2023. Pero no tin sufisiente prueba kontra di e hòmber. Riba 23 di aprel 2023, un boto yená ku droga ta drenta i stashoná su mes na haf di piskadó ayá na Caracasbaai. Algun ratu despues, deskonosínan ta subi tereno di e haf i bai direktamente na e boto ku tabata kontené kokaina. E hòmbernan tabata den un Toyota Hilux i un Kia Picanto. Pero Ministerio Públiko tabata pensa ku U.E lo tabata den e Kia Picanto.

Segun investigashon di OM, un persona ku fam G. lo a fia hòmber E.U e Kia Picanto den oranan di atardi, pero na otro banda a resultá ku ningun di e ko-akusadonan den e kaso aki no a deklará nèt nèt nada tokante di E.U. Pues tin duda si E.U ta embolbí den e kaso di ladronisia di droga ku a drenta riba 23 di aprel 2023. Ya kaba detenshon di e hòmber tabata di skòrs, pero riba djaweps, 27 di yüni, fiskal Hara a rekomendá korte pa imponé un kastigu di 4 aña riba kabes di e hòmber U.E.

Despues ku abogado mr Athena Sulvaran a hiba un defensa sólido, Ministerio Públiko mes a pidi hues pa anulá e kastigu i ordená pa dikta liberta pa E.U. Segun fiskal, e defensa di Sulvaran a konvensé Ministerio Públiko ku e pruebanan kontra di e akusado no ta sufisiente, pues mester deklará e hòmber kompletamente liber.

Mirando e akshon aki, atrobe e diskushon di aresto preventivo ta subi riba mesa. Aktualmente den sala di parlamento tin diskushon nan relatá na renobashon di e kódigo penal, kaminda abogadonan masalmente ta pidiendo mas restrikshon riba alargashon “fásil” di aresto preventivo. Por nota ku den práktika diferente akusado ta wòrdu deklará liber, apesar di a sinta un kastigu pòrnada.

Banda di e kaso kontra di U.E, tabata tin dos otro kaso ku kaminda kastigunan basta pisá a keda sintá pòrnada. Robert A. kende tabata akusado prinsipal den un morto den pos a hañ’é ta sinta un kastigu di dos aña pòrnada debí ku ningun prueba no por a mara e hòmber na e kaso. Pa e hòmber chines Yu W. tambe a keda será pa 42 luna pòrnada. Den e kaso di W., e hòmber a risibí solamente 95 mil florin na daño perwisio. E kaso di W. ta konfirmá ku na Kòrsou tambe tin fayonan hurídiko ta tuma lugá. Legislashon penal den Reino Hulandes no ta kompensá sufisientemente den kasonan manera W. Na Hulanda ta pagando apénas 100 euro pa kada dia será inosente.