WILLEMSTAD – Ministerio di Salubridat, Medio Ambiente i Naturalesa (GMN) ta hasi un yamada na tur kas di ansiano pa registrá nan mes.

Segun e ministerio, resientemente a sali na kla ku un parti grandi di e kasnan di ansiano eksistente ta registrá ofisialmente na e organisashon ehekutivo UO G&Gz i Inspekshon di Salubridat Públiko. Pero ku den práktika ta resultá ademas ku tin tambe un kantidat konsiderabel di kasnan di ansiano ku no ta registrá i ku ta operá sin pèrmit.

P’esei tantu Inspekshon di Salubridat Públiko komo e funshonarionan enkargá ku kasnan di ansiano di e Ministerio di GMN ta hasi un yamada na tur kas di ansiano, pa registrá nan mes denter di 2 siman. Ta konta meskos pa e kasnan di ansiano ku no tin un pèrmit. Nan tambe ta haña dos siman di tempu pa registrá nan mes. “E kasnan di ansiano ku no tin pèrmit lo risibí guia i konseho tokante e proseso pa haña un pèrmit bálido. E registrashon mester tuma lugá promé ku 20 di desèmber próksimo. Por hasi esaki pa medio di e siguiente adrèsnan elektróniko: [email protected], ku ta e funshonario di UO G&Gz; [email protected], ku ta e ofisina mes di Inspekshon di Salubridat Públiko; i [email protected], ku ta funshonario di Inspekshon di Salubridat Públiko.