WILLEMSTAD,—-Tin un dicho ku sigur mester tuma hopi na serio den sektor farandulero i esaki ta bisa ku “Si kaya ta pidi, duna kaya loke ku esaki ta pidi”.

Ta asina ku otro luna ta bai hasi un aña ku e dos agrupashonnan musikal kultural ku ta “Oriri” i “Grik” no a topa ku otro den ningun sorto di kombinashon te pa nan topa ku otro den aktividatnan den kua estilo ku esaki ta. Sea ku un toká den trempan i e otro toká mas lat, esta nan tin kasi un aña sin ta toka bou di mesun dak.

For di diferente ángulo ta saliendo gritunan pa un kombinashon, entre e dos agrupashonnan rítmiko menshoná. Ta asina ku Vigilante Farándula a haña di komprondé ku di parti e organisashon musikal “Grik” nan no tin problema pa toka ku “Oriri”, es mas nan no tin problema pa toka ku niun otro agrupashon musikal rítmiko tampoko.

Sinembargo no ta un sekreto ku gerente i alabes doño di “Oriri” mes, a saka un komunikado aña pasá kaminda ku e la duna di konosé ku su agrupashon no ta presentá den ningun aktividat kaminda ku “Grik” tambe ta presentá, i esaki tabata loke ku a yega serka promotornan tambe. Ta bon si pa tur hende sa, ku den kada kas tin su regla, pues ningun hende no por tuma desishon pa otro.