Robes: abogadonan di Ramon Chong, Michael Bonapart i Sue Ellen Gonzales, a argumenta ku Prokurador General a buska informashon pafó di teritorio.

NIEUWE HAVEN—Apesar ku e poder di korte no por kòrta den e poder legislativo, hues mr Otto  Nijhuis a puntra un pregunta durante tratamentu kaso Chong, kual a pone abogadonan pensa. Na dado momento, durante tratamentu di kaso Chong kontra di eks formadó Peterson, e hues a puntra “kiko tei pasa si niun minister no ke skùif den nan kartera”?. E hues a referí si akaso mester habri luga pa Ramon Chong drenta.

Manera ta konosí, djamars último Ramon Chong a inisiá un proseso pa logra un desishon riba e rechaso di su kandidatura komo minister. Abogadonan di ámbos banda i hues Otto Nijhuis a hiba diskushonnan amplio si korte ta outorisá pa tuma un desishon den e kaso. Segun abogado di Ramon Chong, Partido Nashonal di Pueblo ta wardando riba un desishon di korte pa asumí un posishon. Hues Nijhuis a kuestioná e posibilidat dikon unu di e dos partidonan no por presentá Chong komo kandidato si akaso e proseso di su evaluashon mester tuma luga di nobo.

Segun Ramon Chong, ta PNP por presentá su kandidatura pasobra nan tin 3 asiento i 3 kartera ministerial;. MFK, no por present’é komo kandidato pero tin 9 asiento ministerial. Lokual Chong ta buskando den korte ta un deklarashon di derechi for di korte. Ku e deklarashon aki e por kontinuá pa korte duna órden pa su nombramentu. Segun abogadonan Murray (pa Pik Pisas) i Shanty da Costa Gomez (pa Peterson) esei ta imposibel. Durante a diskushonnan den korte a bin Sali na Kla ku Kòrsou mester adaptá su dekreto pa nombramentunan ministerial. Aruba a adaptá esun di nan miéntras St. Maarten su definishon riba e problemátika ta mas amplio pero nan tambe ta adaptando.

Ramon Chong ta argumentá ku durante su evaluashon pa bira minister, eks formadó Chester Peterson a risibi informashon for di Prokurador General. Pero Chester Peterson a tuma e desishon pero e desishon ta mará na e Dekreto di Integridat. I Peterson tambe ta kore riesgo leve di wòrdu pèrsigui, si e akaso e pone un kandidato ku “klaramente” no ta i no por ta íntegro. Pues si tin un konseho negativo, e formadó no por proponé e kandidato. E formadó ta mará na legislashon i prosedimentu. Ta trata di un konseho prosedente for di 6 instituto ku tin influensha obligatorio riba e formadó. Chong durante su petishon, a buska e rason bou di kua e formadó a basa su rechaso. Unu di nan sigur, ku ya ta konosí ta e hecho ku ainda Chong ta òf tabata riba un lista di persekushon na Prokurador General, apesar di e kumpli ku su kastigu penal.

I netamente riba esaki, Ramon Chong a demanda un proseder nobo di evaluashon di su kandidatura komo minister. Segun abogadonan di Ramon Chong, Michael Bonapart i Sue Ellen Gonzales, si Prokurador General a bai Hulanda pa buska informashon riba antesedente di Chong, e la aktua pafó di teritorio ku ta kubri e dekreto pa integridat ministerial.