Back to Top
Responsive image
E korant di pueblo

Hues no por atendé kaso kontra ING Bank na Hulanda


February 10, 2021 • 2 minüt pa lesa

Willemstad,– Wes den promé instansia a duna un veredikto den un kaso ku Roxana N.S. Jurrjens  a entamá kontra ING Bank N.V. na Hulanda for di 2019.

Den un akta di notario, traha i firma na Rotterdam,  Jurrjens a komprometé su mes di lo kumpli ku pago di un krédito di hipotek di 101.250,00 Euro ku a keda duna na su yu i su suegro.  

Na 2012 e kas, riba kual tabatin e hipotek, a ser bendé lagando un debe atras di 44.644,48 Euro. Dia 24 yanüari 2019 ING a pone beslag riba e kas

Jurrjens ta trese dilanti ku el a sufri daño dor di e beslag ku ING a pone, mustrando riba artíkulonan den Areglo di Belasting di Reino, den Areglo di Estado di Kòrsou, den Ordenansa di Penshun di Behes i den Ordenansa di Penshun di Empleadonan Públiko.

Jurrjens su petishon pa ehekutá e veredikto mes ora loke ke men:

  1. Manda stòp ING inmediatamente ku kobramentu i para e beslag.
  2. Obligá ING pa de inmediato duna bèk tur e plaka ku el a kobra, basa riba e beslag.
  3. Kondena ING pa paga gastunan di e kaso.

ING a kuminsá su defensa  alehando ku Wes no tin outoridat den e kaso aki

Despues ING ta trese dilanti ku Jurrjens su petishon no tin base, paso e beslag tin un base legal, e debe di e sobra montante a keda rekonosé i no tin kestion di ku ING no tin e derecho pa kobra.

Wes  a konstatá ku e petishon di Jurrjens no tin un base legal.

Ningun momentu Jurrjens no a bisa ku ING a aktua kontra lei òf ku e no a kumpli ku su obligashon para den e kontrakt, ni tampoko e no a trese nada dilanti ku lo e por tabata ke men asina. No tin ningun duda tampoko ku Jurrjens a rekonosé e montante riba kual ING a pone beslag i ku basa riba e akta di notario ING tabatin derecho di tuma medida.

ING ta haña rason ku su ponensia ku Wes no ta outorisá pa tuma desishon den e kaso i p’esei mes e no a trata e kaso den su kontenido. ING ta establesé na Hulanda i e kaso tin di haber ku Hulanda. E akuerdo ku ta e base riba kual ING a pone  beslag, a ser firmá na Hulanda dor di e dos partidonan, di kual Jurrjens mes ta biba na Hulanda. Pues e kontrakt ei ta kai bou di lei Hulandes. E kas en kestion ta na Hulanda i e beslag tambe a keda pone na Hulanda.

Pues den e kaso aki artíkulo 103b Rv no ta duna Jurrjens bastante derecho pa entamá un kaso.

Finalmente e desishon di Wes ta ku en bèrdat e no ta outorisá pa atendé e kaso aki i e ta kondena Jurrjens pa paga e gastunan di ING ku a keda kalkulá na FL. 2.500.00 ku ta salario di e defensa di ING.  

Login