WILLEMSTAD – Hulanda no por kompartí informashon for di ni tokante di Kòrsou den kuadro di e lei hulandes ‘Wet Open Overheid’ (WOO), sin pèrmit dje komishon nashonal di reforma NHC di gobièrnu di Kòrsou.

Esaki ta konforme e anekso B yamá ‘Werkwijzereglement Curaçao’ dje akuerdo mutuo será ku Hulanda (Onderlinge Regeling, OR), ku ta regla e método di traha pa ku implementashon dje reformanan den sektor públiko di Kòrsou.

Gabinete Pisas 2 algun biaha a pidi atenshon pa e forma riba kua e organisashon Tijdelijke Werkorganisatie (TWO), e ministerionan hulandes i otro institushonnan gubernamental ta trata ku informashon konfidensial òf no públiko di gobièrnu, den kuadro di e lei hulandes WOO. Segun Pisas, ora di koperá ku otro i interkambiá di informashon ku e institushonnan gubernamental menshoná, e counterparts di Kòrsou ta kompartí un gran kantidat di informashon ku TWO, e ministerionan hulandes i otro institushonnan gubernamental ku no ta destiná pa publikashon (general).

P’esei den su reakshon riba diferente rapòrt tokante progreso dje ehekushon dje Pakete Nashonal, ela bisa ku tokante di esaki tambe mester traha afspraknan riba término kòrtiku den e reglamento, manera reglá den OR. Den su reakshon di reakshon di 1 di mart último riba e Rapòrt di Ehekushon tokante Kòrsou, ela ripití meskos. TWO a reakshoná riba esaki bisando: “Den e karta di Sekretario di Estado Van Huffelen pa Minister Silvania di dia 13 di febrüari último ta splika den detaye kon Hulanda ta trata ku e informashon akí, ku referensia na e prosedimentu ku mester sigui ora di publikashon i e motibunan pa ninga ku e lei WOO ta ofresé. Esaki ta demostrá ku Hulanda lo no divulgá informashon sensibel, ku e apelashon riba e interes di relashonnan internashonal i/òf un bon funshonamento di Estado i/òf opinionnan polítiko personal pa deliberashon interno.

Konforme artíkulo 20 dje ‘werkwijzereglement’ si Hulanda risibí un petishon di informashon a base dje lei WOO, ku tambe ta referí na informashon for di i tokante di Kòrsou, Hulanda (lesa TWO) mester diskutí esaki delantá ku NHC i tambe mester tene kuenta ku e opinion di Kòrsou, promé ku tuma un desishon. Ya ku ei lei WOO no ta aplikabel na e paisnan den Karibe. Konforme artíkulo 21 insiso 1 ku ta regla publikashon di sobrá dokumentonan di proyekto, TWO no por publiká niun dokumento ni informashon tokante di proyektonan, programanan ni medidanan den e konteksto dje Pakete Nashonal, ni kompartí esakinan ku tersernan, sin pèrmit di NHC. Ta tene kuenta ku e obligashonnan legal di konfidensialidat, inkluyendo e obligashonnan legal ku ta pisa riba empresanan gubernamental i otro obligashonnan legal ku ta apliká na Kòrsou.

Insiso 2 dje artíkulo akí ta sigui regla ku mester sera akuerdonan por eskrito entre TWO i NHC pa loke ta trata e publikashon di rapòrtnan di investigashon of hayasgonan durante investigashonnan òf ouditorianan realisá pa agensianan eksterno òf nò, ku insiso 1 ta referí na dje promé ku start ku e investigashon òf ouditoria.