UTRECHT—Charlene de Carvalho-Heineken ta evadí sumanan kuantioso di belasting ku e mester paga den Hulanda.

Esaki di akuerdo ku NRC a base di propio investigashon. Heineken pa años ta e hulandes di mas riku. E ta akshonista mayoritario di e kompania Heineken komo úniko heredera di magnate Freddy Heineken, ku a fayesé den 2002. Segun kalkulashonnan di NRC su kapital ta mínimo 16 miar euro. Den kaso di evashon di belasting ta trata dividendo ku e ta risibi di su akshonnan den Heineken. E mester paga 15% di belasting dividendo pero el a laga sientos di miones di dividendo pasa via un kompania fiktisio na Luxemburg pa paraiso fiskal Jersey durante último añanan. Asina el a paga solamente 2,5% na belasting. Esaki a kosta kaha di gobièrnu alrededor di 30 mion euro pa aña. E konstrukshon fiskal a keda prohibí pa gabinete entrante 1 yanüari ku un medida. Awor Heineken ta kanalisá e plaka bou di otro konstrukshon: restitushon di kapital di akshonnan. Asina e no ta paga belasting dividendo mas. Evashon di belasting ta un fenomeno indeseabel, segun sekretario di estado demishonario di Finansa van Rij na Tweede Kamr. Ku evashon di belasting e gastunan general ta bai pa siudadanonan i kompanianan ku si ta paga belasting anto na tempu. E residensia ofisial di Heineken ta na Suisa (Perroy) pero gran parti di aña e ta biba na Inglatera. Un bosero di famia ta informá NRC ku no ta papia riba preguntanan ku ta mishi ku bienes privá di e famia.