Transportá: momentonan bastante emoshonal na Marie Pampoen despues di a hiba kurpa di Wiels pa kas funerario.

Marie Pampoen—No tin niun motibu polítiko tras di e morto di Wiels. 11 ana despues, Korte den Tres Instansha, no por a deskribí e motibu pakiko a asesiná Helmin Wiels riba 5 mei 2013. Despues di a produsí un dokumental na 2017 papia ku tur di esnan kondena den e kaso, abogadonan i demas envolvi, Vigilante no por konkluí nada otro ku hustisia hulandes, ku kende Wiels tabata duna informashon, no a protehá e lider polítiko sufisiente.

Djadumingu último a bira 11 aña ku Elvis Kuwas a asesiná Helmin Wiels. 3 persona a risibi kondena pa e morto di Wiels. Tur tres e verediktonan a yega Korte di Kasashon  i konfirmá. 10 aña despues ku Wiels a fayesé, tur kos rònt  di su bida a kambia. Betty da Fonte, e konkubina di Helmin Wiels, a bandoná Kòrsou i bai biba na Madeira. E pareha tabata kompartí un kas patras na Seru Loraweg, kual da Fonte a bandoná pa Madeira. Da Fonte ta bibando serka su rumannan na Madeira. Pueblo Soberano, e partido ku Wiels a bai laga na mando, a perde tur nan asiento den parlamento i poder den polítika. 11 aña despues, no a keda kasi nada mas di lokual Wiels a bai laga atras.

Apesar di tabatin tres kondena, nunka a bin sali na kla kiko tabata e motibu dikon a mata e lider polítiko. Kòmbersashonnan sekreto entre Wiels i RST, a keda menshoná den korte. E kòmbersashonnan a keda sigur 3 aña skondí pa Ministerio Públiko i fiskal enkargá, Gert Rip.  A bin sali na kla ku Helmin Wiels tabata informante di RST i ku Wiels a duna tip na hustisia riba baho mundu, di e.o. defuntu Luigi Florentina. E rol di e.o. oloshi hòrta i tipnan ku Wiels tabata duna hustisia, a bira punto fini pa determiná fo’i unda wes a konkluí ku Wiels tabata un “tipgever” di kisas RST. Den korte e diskushon aki a bini dilanti regularmente. Úniko instituto ku tabata por sa esaki tabata RST kende Wiels a konfia. Segun unu di e wesnan den e kasonan, mr. Lieshout , e informashon aki a lèk yega baho mundu.

E lèkmentu di informashon te ainda despues di a trata e kasi durante 11 aña, ta e motibu dikon Helmin Wiels a fayesé. Korte a sospechá i menshoná den su verediktonan ku tabata baho mundu ku a asesiná Wiels. Esaki tabata un dato importante pa kompará awor ku wes den Korte di Prome Instante tambe a konfirmá durante tratamentunan ku Wiels a duna tip riba esnan kende tabata hòrta oloshi i bara di oro. Den su veredikto, Korte a konfirmá den kaso Maximus, ku Helmin Wiels tabata papia ku hustisia i a duna tip riba aktornan den baho mundu, entre nan defuntu Luigi Florentina. E informashon aki ta unu balioso, pasobra semper Ministerio Públiko a ninga ku esaki tabata bèrdat. Despues fiskal Gert Rip a atmití ku Wiels tabata papia ku RST. Pues a keda konfirmá ku Wiels tabata duna RST tip. I tabata trata tip riba aktornan ku tabata traha tambe pa e organisashon kriminal NLS.

De fakto, un persona kende Wiels tabata papia kuné sigur ta eks hefe di RST, sr. Eric K.. Semper tabatin e sospecho ku e funshonario aki tabata sa dje testimonionan di Wiels, pero ku nunka no a yega di traha un prosès ferbal di dje. Di un manera masha misterioso, Eric K a bira konsehero di Nelson Navarro despues ku Wiels a bin fayesé. Kade Wilsoe, eks minister di Hustisia semper a kuestioná Wiels riba su kòmbersashonnan ku RST. Wiels nunka no a duna niun hende splikashon, pero miéntras e tabata papiando malu di “makambanan na Kòrsou”, den sekreto e la traha un dil ku ku RST. E dil a enserá ku e ta duna informashon kual lo kondusí na arestonan polítiko i eks miembronan di NLS, pero Erik K. mester bira konsehero di Minister di Hustisia despues.

I asina a sosodé. Erik K, a bira konsehero di Minister Nelson Navarro . Den un deklarashon personal ku Navarro a hasi na Vigilante, e la atmití di nunka a komprondé ta kon bini e hòmber Erik K., kende tabata hefe di RST te ku dianan ku Wiels a fayesé, a bira su konsehero despues. E desishon di hasi Erik K. konsehero di Nelson Navarro, segun un otro eks minister di hustisia, Kade Wilsoe, tabata unu di Helmin Wiels. Esaki ta nifiká ku Wiels a papia ku Eric K. riba su posishon nobo despues di baha komou team chef na RST. Segun Wilsoe, Helmin Wiels a konfirmá e motibu dikon Erik K. tabata papia kuné. Wiels a bisa Wilsoe, ku Erik K.  tabata ke un posishon komo konsehero di minister. E temporada ei, Pueblo Soberano no tabatin e kartera di hustisia mas, pasobra Wiels a rechasá e kartera. Wiels a tene e kòmbersashonnan ku RST un sekreto, pa evitá un bèrgwensa pa Pueblo Soberano pero tambe pa e informashonnan delikado ku e tabata suministrá Erik K.. For di Novèmber 2022, Wiels a kuminsá skats riba eis fini, manera Hulandesnan ta bisa. Wiels a papia riba e.o. baranan di oro hòrtá den haf i robonan di oloshi unda eks miembronan di NLS tabata aktivo den ámbos kaso. RST a inisiá tambe investigashonnan penal den ámbos kaso, unda e.o. aresto i kondena den ámbos robo di oloshi, na Kòrsou i na Aruba a bin kai. E kaso di oloshi tabata asina delikado, ku Ministerio Públiko mester a protehá dos akusado den e kaso hibando nan pa Hulanda i Aruba. Tabata despues di e morto di Wiels, ku fiskal Gert Rip a solushoná e dos kasonan di oloshi hòrtá, unda por sierto defuntu Luigi Pretu Florentina tabata kordinadó di ámbos. “Tabata den e tipo di laman aki, ku Helmin Wiels a subi pa nabega”. Si lesa verediktonan di Korte den Promé Instante por nota un relashon dirèkt entre lokual Wiels a papia ku RST i konklushon di korte.

Asesinato di Wiels, de fakto no tabata nada kompliká. E informashon ku Wiels tabata papia ku RST i Erik K. , a bin kai den grupo kriminal di atrakadónan di oloshi i bara di oro den haf. P’esei pa tal motibu, nunka no por separá e morto di Wiels for di oloshinan hòrta. Korte tambe a trata na buska e relashon durante tratamentunan. Segun Fiskal Gert Rip, e planeamento riba morto di Wiels a start riba 2 di yüni 2012. Riba e dia en kestion, tabatin un robo di oloshi den mall na Renaissance Hotel. Ta sospechá ku defuntu Pretu Florentina tabata envolví den e robo. E grupo di Florentina tabata sospecha ku Wiels a papia ku RST riba e robo. E lèk a bini pasobra un funshonario di RST, a lèk esaki na unu di su “amiganan”, kende te awe a disparsé, pasobra e amiga tabatin kontakto ku miembronan den e organisashon di Florentina. Wes den Promé Instansha a menshoná i konfirmá ku mester tabatin un “lèk” . I ta netamente e lèk ei, a kondusí na morto di Helmin Wiels.