Richard Doornbosch: inflashon lo sigui afektá preis kolektivo di konsumo lokal.

Skalo—Anke e ta ménos kompará ku 2020 2021 , inflashon internashonal na 2022 a influensha preis doméstiko durante 2023 i lo sigui hasi esaki tambe durante 2024. Esaki ta lokual Richard Doornbosch a duna di konosé djarason último durante un rueda di prensa.

Doornbosch a splika ku e inflashon internashonal a baha di 8% i bai bou di 7% miéntras e bahada na Hulanda i Estádos Unídos tabata mas konsiderabel. Anke ta papia di e bahada den inflashon for di merkadonan importadó pa Kòrsou, e inflashon internashonal ta sigui influensha preisnan riba merkado doméstiko na Kòrsou, segun Doornbosch. Esaki ta un desaroyo pa tene kuenta kuné tambe. Ta definitivo ku ekonomia di Kòrsou lo sigui importá inflashon for di paisnan fo’i unda nos  ta importá. Segun sifranan di Banko Sentral tantu Estádos Unídos komo Hulanda lo konosé bahada leve den inflashon. Miéntras Kòrsou sigui importá for di e paisnan menshoná, e inflashon na Kòrsou tambe ta sigui ménos haltu durante 2024 kompará ku 2023.

Tin dos faktor importante ku ta bai afektá preis di konsumo na Kòrsou. E inflashon riba merkado estado unidense i hulandes ya ta pone ku Kòrsou ta importando na preisnan haltu for di ámbos merkado, pero tambe e efektonan logístiko den ámbos pais, unda prinsipalmente transporte i labor ta birando mas karu.  Aparte di ta importá inflashon for di ámbos pais menshoná, e desaroyo di inflashon riba merkado lokal tambe ta di influensha, debí na un korelashon dirèkt ku produktonan i importá na preisnan mas haltu. Na Kòrsou despues di a konosé un bahada na finalnan di 2018 pa inisio di 2019 manteniendo inflashon bou di 1%, 2020 pa 2021 a konosé un oumento drástiko di inflashon yegando kasi 3% na finalnan di 2021 miéntras na 2022 el a yega 7.4%, por lo mínimo eskalando den sierto kategorianan di produkto. Na 2023, segun Banko Sentral e inflashon a baha konsiderabel keda bou di 4%.

Inflashon tin influensha grandi pa siudadanonan den klase di entrada abou pa mediano abou. Pa produktonan den makutu básiko  i awor ku gobièrnu ta deseá riba ampliashon di e makutu, esaki no ta un bon notisia pa importadónan.  Tantu na St. Maarten komo na Kòrsou, preis di konsumo ta aselerá debí na e problema logístiko den e kadena di provedornan internashonal.  Mas aleu desaroyo den preis di krudo tambe a sostené un oumento den preisnan di konsumo pero esaki a baha durante 2023 pa lokual ta trata su efektonan riba preis di konsumo. Kòrsou ku for di 2018 ta importando kombustibel ta kuminsá sinti multi efekto riba su oumento di preisnan kolektivo pa produktonan di konsumo. Na Kòrsou, inflashon a subi di 2.2% na 2020 i yega te na 3.8% na 2021. Na 2022 e tabata 7% i na 2023 4%, segun Banko Sentral. E oumento ta den mesun liña komparabel riba merkado di konsumo na Estádos Unídos. Pa 2024, pronóstikonan ta mustra posibilidat di un inflashon entre 4 pa 6%. E desishon pa amplia e makutu básiko, durante un periodo ku nos ta importando  inflashon i konsekuentemente oumento di inflashon riba merkado di konsumo lokal, ta kòrta dirèkt riba márgen di ganashi for di kompanianan importadó. Pues por lo pronto no ta konsehabel oumentá e makutu básiko. Di otro banda, gobièrnu tampoko no tin muchu opshon. Sin amplia e makutu básiko, konsumo kolektivo ta bira mas kostoso pasobra produktonan pafó di e makutu ta bira mas karu. Kisas ta bon pa investigá desaroyonan den preis di produktonan na supermerkadonan entre 2021 pa 2022 i relashoná esakinan na 2023.