Willemstad——–Analistanan di krímen di e islanan Karibense i Hulanda, Fransia i Guyana a bini huntu siman pasá na St. Maarten pa un konferensia dirigí riba kolaborashon den Karibe.

Krímen organisá trans-nashonal i violensia ta wòrdu menshoná den rapòrtnan internashonal komo problemanan di krímen di urgensia den área di Karibe. Ounke ku nos islanan no ta konsiderá komo paisnan ku ta fuente i/o origen di por ehèmpel droga, nan ta wòrdu usá si komo trampolin pa e produkto yega su destinashon. Otro menasa pa e islanan aki ta krímen sibernétiko, weganan di plaka ‘online’, trafikashon di hende, labamentu di plaka i korupshon. Tambe e region ta keda konfrontá ku situashonnan di froude/malversashon di krísis, krísisnan relatá na krímen manera destrukshon dor di orkan i temblor. Kriminalnan ta usa e mesun teknologianan ku polis i esei ta nifiká ku polis mester ta semper un stap mas dilanti ku e malechor. Esaki únikamente por ta posibel si analistanan di krímen den region traha huntu i ku tur kuerponan polisial den Karibe funshoná manera instansianan ku ta generá informashon. E proseso di generá informashon ta bira mas i mas importante pa kombatí kriminalidat riba tur área. Pa esei data mester wòrdu bon interpretá i analisá. E konferensia aki sigur tabata unu fruktífero, kaminda a para ketu na e konsientisashon di interkambio di informashon di paisnan den region, pa hiba e lucha kontra krímen di un manera mas efisiente i integral.