AMSTERDAM—Akshonistanan di kompanianan grandi hulandes ta prinsipalmente gerentenan merikano di kompanianan di invershon grandi.

Solamente un frakshon di akshonistanan direkto ta biba na Hulanda. NOS Nieuws a inventarisá ken ta e akshonistanan di ASML, Shell, Unilever, ING, Ahold Delhaize, Heineken, DSM i Philips, kompanianan grandi di origen hulandes. For di analisis ta indiká ku ganashinan grandi di e kompanianan apenas ta resulta serka penshonadonan, pero ta bai pa akshonistanan privá ku ta benefisia di e ganashinan. Nan tin mas akshon den e kompanianan grandi mientras fondonan di penshun ta reparti nan invershonnan mas pa tene e risikonan abou. Ta bini aserka ku hopi plaka ta keda inverti via atministradonan di invershonnan merikano i esaki por trese problemanan segun ekspertonan. Fondonan di penshun i invershonistanan privá por inverti nan plaka dos manera, sea direktamente of via un atministrado di kapital. Nan ta inverti plaka di otronan manera persona, fondonan di penshun of kompanianan di seguro i nan ta haña un kompensashon. E tre mas grandi na mundu ta merikano: Blackrock, Vanguard i State Street. Fondonan di penshun chiki hulandes hopi biaha no tin e rekursonan pa nanmes inverti plaka i ta buska intermediario, fondonan di penshun grandi manera ABP i PFZW ta hasie tur dos manera. E fondonan di penshun mas grandi ta inverti huntu 400 mion euro den Blackrock, Amundi i State Street. Blackrock ta maneha 8050 miar euro i nan ta den e top 3 di invershonistanan. Esaki por forma un problema. Kon bo ta soru ku bo ta sirbi e interesnan adekua si bo ta e invershonista mas grandi serka e kompetensia tambe.