A registrá yobida nan fuerte durante henter un siman.

RIO DE JANEIRO – E inundashonnan kousá pa fuerte yobida na sùit di Brasil a kousa mas di 86 morto i otro 134 persona ku ainda ta reportá komo pèrdí. Esaki ta nifiká dos morto mas i otro 23 persona mas reportá komo pèrdí, kompará ku sifra nan anterior. E sitashon a afektá e estado di Rio Grande do Sul di un forma basta grave, situá na frontera ku Argentina i Uruguay.

Outoridatnan ta investigando e kousanan di otro kuater morto, pa asina logra determiná si esaki nan ta relashoná ku e áwaseru, ku ta afektá e parti sùit di Brasil ya pa un siman kaba.

E region mas afektá ta Rio Grande do Sul, unda a registrá 85 di e 86 víktimanan mortal i e otro víktima tabata na un estado bisiña, Santa Catarina.

E yobida nan aki, ku apénas a kuminsá mengua den e zona di e pais despues di un siman sin stòp, a afektá mas di 1.1 mion di abitante di e 385 munisipio nan di e pais. Esaki nan ta sufriendo falta di alimento, medisina i servisio nan básiko manera entre otro koriente i awa.

Segun datonan di Defensa Sivil, 153.824 persona a keda obligá di bandoná nan bibienda nan i bai serka famia òf konosí nan, miéntras ku otro 46/676 ta den albergue nan improvisá.

E riu Guaiba a inundá e sentro históriko di Porto Alegre, kapital regional, i vários siudat nan di e área metropolitano. Pero e inundashonnan i avalancha nan di tera a kousa daño enorme na diferente lokalidatnan na interior di Rio Grande do Sul.

Ku un poblashon di 11 mion di abitante, Rio Grande do Sul tin un total di 496 munisipio, di kua 385 a keda afektá.