Patrick Newton i Herbert Mensche ainda enkargá ku e tarea di logra un sosio pa Refineria Kòrsou.

Nieuwe Haven—Eks sosionan den CPR, tin idea bastante konkreto pa introdusí un sosio finansiero nobo den e proyekto pa manehá Refineria Isla. Despues ku entre sosionan den CPR a bini un desakuerdo, e grupo venezolano kier trese un sosio nobo INVEMA.

INVEMA, supuestamente mester ta mandando of a manda un karta na RdK, konfirmando ku nan ta dispuesto na pone 150 mion dòler  komo garantia riba un kuenta intermediario, miéntras ta negoshando un “Heads of Agreement”. Esaki ta nifiká ku definitivamente e yu di Kòrsou,  Erchenel Doran i su eks koleganan direktor, Alejandro Marquez, Raul Socorro i Leonardo Taborda a separá. Por lo pronto, Erchenel Doran ta keda ku kòntròl riba e akshonnan den CPR BV, pero mester tene hopi koutela pendiente un tratamentu a fondo entamá pa mesun grupo di venezolano. Awor ku e grupo venezolano a pèrdè kòntròl riba CPR, nan a lanta un kompania nobo, Baranka Petroleum. Miéntras tur e desaroyonan menshoná ta tumando lugá, na Bullenbaai tambe a kibra kontrakt ku CPR. Otro siman, por spera algun kasonan sivil den korte keda registrá pa tratamentu.

 E problema pa kòntròl riba CPR BV, kompania ku tabata den negoshashon pa manehá Refineria Isla, tin di haber ku 40 pa 50 mion florin di balor na fuel oil den tankinan di Bullenbaai. En total, 490 mil bari ku for di sèptèmber 2022 ta drumi warda e doño sali pa keda bendí. En realidat te ainda, ni tampoko korte, niun hende no ta na altura ken ta doño dje lote mionario di fuel oil. Un kompania Knob Trading, ku tin un sup kontrakt ku CPR pa fasilidatnan na Bullenbaai te ta pagando CPR i un otro kompania Socap (Raul Socorro), pa por paga CRU di Kòrsou. Socap tabata e kompania ku a gana e bid pa manehá  Refineria isla pero a pasa e derechinan pa CPR BV i CPR Holding

E dos partidonan den e disputa tabata kompletamente negligente riba nan splikashon kon e kosnan realmente ta hinká den otro. Esei alabes tabata unu dje m,motibunan ku hues van Leeuwen no tabata kier kima dedenan di korte i opta pa mantené e disputa  den un proseso a fondo. Ta yega un dia ku e 40 mion florin na fuel oil mester sali for di Bullenbaai, esun ku sak’é ta mionario. Representantenan di CPR, eks direktornan di e kompania, durante e tratamentu no a mustra niun klase di interes pa papia riba proyekto di Refineria Isla, lagando atras un interogatorio grandi na korte, ta “dikon ta bringando pa interes di un kompania sin ta menshonando detayenan importante”.

E intenshon  ta pa presentá un karta di intenshon na Refineria di Kòrsou pa kuminsá e proseso di permití INVEMA komo sosio ku Socap, of kalke otro kompania liga ku e grupo di Socorro manera Baranka Petroleum.