PARIS – Faltando sinku luna pa inisio di e weganan olímpiko di Paris esaki ta ser relashoná un biaha mas ku otro polémika finansiero.
Aparentemente e presidente di e komité organisadó, Tony Estanguet, lo a risibí un entrada muchu mas haltu ku e salario máksimo aprobá.
Segun informashonnan publiká den prensa franses e fiskalia finansiero nashonal lo ta investigando e suma risibí pa e eks kampion olímpiko di kanotahe. Segun prensa e dirigente Estanguet lo a risibí un kompensashon balorá na 270 mil euro bruto anual te ku 2020.
Segun e reglanan stipulá di e federashonnan di e komité olímpiko esaki ta demasiado altu. E departamento finansiero ku mester guia i ehekutá e investigashon no tabata ke duna niun komentario al respekto.
E komishon olímpiko organisadó a reakshoná “ku konsternashon’ riba e investigashon di kompensashon risibí pa su presidente Estanguet. E rekompensa otorgá na Estanguet a keda stipulá e tempu ei pa un komishon di ekspertonan independiente segun e komité organisadó.
Adishonal tin un total di tres investigashon finansiero separá andando tambe kontra organisashon di e weganan olímpiko i paralímpiko na Paris. Eseinan ta basá prinsipalmente riba sospecho di faboresé amigunan i malversashon di fondonan públiko durante entreganan di kontrakt.