Merka, — Kasi un siman despues di a yega Merka for di Perú, e sospechoso di desaparishon di e Merikano Natalee Holloway, Joran van der Sloot ta pasa su dianan den un sel na e prison di Shelby County na Columbiana, Alabama. Tabatin krítika di parti di esnan ku a eksperiensha e proseso, alegando ku vd Sloot tabatin un aktitut basta sarkástiko, hariendo ora ku e tabata wòrdu prosesá na su yegada. 

Korte
Un dia despues ku e la yega Merka, e la keda prosesá den Korte Hugo L. Black United States Courthouse pa 11’or di mainta (djabièrnè). Despues di esei, e la bolbe den su sel, ku ta di un persona. E ta permití pa sali un ora pa dia, pero no huntu ku otro prizoneronan sino su so. Y e ta kome su kuminda den su sel, enbes  di den e cafeteria. “E no ta papia, e no ta komuniká, pero e ta parse kontentu unda ku e ta” un fuente den e prison a revelá. 

E kargo
E kargo a indiká ku vd Sloot lo a revelá e lokalidat unda ku e kurpa di Natalee Holloway ta dera, na su mama Beth, a kambio di $250.000 dòler. Finalmente e la aseptá e suma di $25.000,= y despues lo a suministrá informashon falsu na e famia. E kargonan ta basa riba plan deskubrí via un total di 79 email entre e abogado di famia Hollloway (John Q. Kelly) y Joran mes. “Mi lo hibabo na Natalee, pero mi no kier pa e informashon a bin dimi” Joran a skirbi na 2010,  segun dokumentonan obteni. “A kambio mi kier $250.000,=”, Joran a bisa. E kurpa sinembargo nunka no a wòrdu lokalisá. Si hañ’é kulpabel, ta spera Joran un kastigu di 25 aña di prison pa kada un di e 2 kargonan, esta estafa y froude.