E kahera mester paga e banko bek un kantidat sustansial di plaka.

WILLEMSTAD – Korte di Promé Instansia den kasonan Sivil a mantené e desishonnan anteriormente tumá riba 21 di mart i 17 di òktober aña pasá, den kua un empleado a risibí kondena pa ekstorshon di su dunadó di trabou, Orco Bank NV.

Den e sentensia di 21 di mart a stipulá ku den e kaso akí ta trata e pregunta kuantu plaka e empleado a ekstorshoná. Ku el a hasi su mes kulpabel na esei no ta den disputa. Sí ta den disputa e periodo den kua e ekstorshon a tuma lugá i kon altu e suma ekstorshoná ta i tambe mesora kon altu e daño ku e banko a sufri ta. E daño ku e banko a sufri ta konsistí di e suma ku e banko a paga e partidonan perhudiká, esta Wet&Wild i BBC pa e kontrato di establesimentu será na balor di 410 mil florin.

Korte ta pone dilanti ku esun ku a kue plaka di otro no por alegá ku e otro ei mester a paga tinu mihó. Esei ta konta sigur den un situashon manera esaki, den kua atendé di forma kouteloso i íntegro ta e funshon (prinsipal) dje empleado. “Mester por spera di un kahera ku e ta pone su dunadó di trabou na altura di défisitnan den su prosedura di konta, i no manera e hòmber akí a hasi i hasi maluso dje situashon. E daño dje banko no ta un konsekuensia pues di un sirkunstansia ku e banko mes tin kulpa den dje, manera artíkulo 6:101 di Kódigo Sivil ta stipulá.”

Pues e alegashon ku e banko mes tambe tin falta no ta konta. Esei ta nifiká ku e banko mes no tin ku paga parsialmente pa e daño sufrí pa motibu dje ekstorshon. Den e sentensia di 17 di òktober a nombra InFocus komo eksperto, pa kontestá algun pregunta. Manera kiko ta e diferensia entre e periodo di 1 di yüli 2014 te ku 31 di sèptèmber 2015 entre e estadonan dje kasanan di Wet&Wild i sumanan riba nan kuenta. Finalmente Korte a disidí ku e kahera mester paga 410 mil florin. Pero komo ku a konden’é kaba na pago di 30 mil florin anteriormente, Korte a disidí na konden’é e biaha akí na pago di 380 mil florin.