Presidente di Parlamento Charetti America-Francisca

WILLEMSTAD – Algun ratu pasá Presidente di Parlamento Charetti America-Francisca a anunsiá e planifikashon pa trata e Presupuesto 2024 di pais Kòrsou, ku tabata planiá pa siman di 18 di desèmber próksimo.

E sirkunstansia imprevisto rondó di pèrdida di Miembro di Parlamento Amerigo Thodé, ta hasi ku lo mester hasi un kambio i plania e reunion públiko pa trata e Presupuesto 2024 den un otro siman. E Presidente lo stipulá un fecha/periodo nobo i lo informá gobièrnu di esaki. Asina el a splika den un karta fechá 15 di desèmber dirigí na Parlamento. Parlamento ta bai ku resès dia 23 di desèmber awó te 5 di yanüari otro aña. Durante e periodo akí no tin reunion, pero sí por yama un reunion pa asuntunan di interes nashonal. Parlamento di tur manera ta wardando tambe e nota di kambio ku Minister di Finansa Javier Silvania mester entregá, ya ku e proyekto di lei pa Presupuesto 2024 ta unu temporal. No a inkluí diferente aspekto den e presupuesto akí, ya ku negosiashonnan ta(bata) andando ainda ku Hulanda. Silvania a pidi tempu pa entregá un presupuesto adaptá ku tur informashon mas lat, pero a haña diferente krítika for di huki di oposishon i a entregá esun no kompleto numa. E kontestanan di gobièrnu riba preguntanan hasí tokante e reunion den Komishon Sentral sí a yega Parlamento kaba, manera Vigilante a informá.