Presidente America-Francisca votando.

STO.DOMINGO/WILLEMSTAD – Na kuminsamentu di e reunion di “Comisión de Desarrollo Sostenible, Medio Ambiente, Política Energética, Investigación, Innovación y Tecnología”, entre otro Presidente di Parlamento Charetti America-Francisca a vota riba 54 amienda riba e proyekto di informashon di “Declaración Universal de los Derechos de la Naturaleza” na Sto. Domingo durante e reunionnan di EuroLat. Despues a sigui ku interkambio riba diferente tema ku ta kai bou di e komishon akí, manera kambio di klima.

Nos Presidente di Parlamento a asistí na e reunionnan ku a start dia 30 di òktober último i ku entretantu a terminá. E Asamblea Parlamentario Euro-Latino Americano (EuroLat) ta e asamblea kaminda ta tene reunionnan entre e komponentenan Parlamentario di Europa i Latino Amerikano. Manera ta konosí e reunion akí ta tuma lugá dos biaha pa aña, di kual un biaha na Europa i un biaha den Latino Amérika. E biaha akí a toka turno na Latino Amérika i Repúblika Dominikana tabata anfitrion. A tene e reunionnan den e salanan di reunion di e Senado di Santo Domingo. Presidente di Parlamento Kòrsou ta asistí na e reunionnan akí pa medio di e representashon den Parlatino. E ta miembro di e “Comisión de Desarrollo Sostenible, Medio Ambiente, Política Energética, Investigación, Innovación y Tecnología”, pa Parlatino.

Apertura di e Eurolat mes a tuma lugá den e sala di Asamblea General, kaminda e Vise Presidente di Repúblika Dominikana, Presidente di e Senado, Visepresidente di e Senado i e Presidentenan di e diferente komponentenan di Latino Amerikano i Europa a hiba palabra. Presidente di Parlamento America-Francisca tabatin e oportunidat di a sera konosí i hiba algun palabra ku e Presidente di Senado Repúblika Dominikana, Ricardo de los Santos.

E ko-presidèntnan di e Asamblea na EuroLat, Javi López, presidente di Delegashon di Parlamento Europeo na e Asamblea Parlamentario Euro-Latinoamerikano, i Amado Cerrud Acevedo, presidente di e komponente Latinoamerikano, a yuda dirigí e seshon di inisio ku a tuma lugá riba 31 di òktober, kaminda tambe a presensiá kontribushonnan di Faride Raful, Visepresidente di Senado; De los Santos, presidente di Senado; Cristina Reyes, presidente di Parlandino; Mario Colman, presidente di Parlasur; Silvia Giacoppo, presidente di Parlatino; i Raquel Peña, Visepresidente di gobièrnu di Repúblika Dominikano.

E programa di e reunionnan di Eurolat a inkluí e kuater komiténan, e Büró Ehekutivo, e Grupo di Trabou tokante Seguridat di Kuminda, e Enkuentro ku Sosiedat Sivil i e Foro di Latino-Europeo di Muhé merikano.

E reunionnan di Eurolat tabata enfoká bou di tres pilarnan prinsipal: Migrashon, un tema di gran importansia pa e dos regionnan manera e situashon na frontera di Repúblika Dominikano ku Haiti ta proba; Aliansa Digital i Edukashonal, kaminda a pone énfasis riba asuntunan importante pa desaroyo di nos sosiedatnan manera transformashon digital, inteligensia artifisial i seguridat riba liñanan elektróniko, i kaminda a balorá e Aliansa Digital EU-LAC ku a lansa na Bogotá na mart último i e agènda di invershon planiá pa EU-LAC Global Gateway; i Lucha kontra kambio di klima i su efektonan, kaminda Asosiashon Stratégiko Bi-regional EU-LAC por hasi un kontribushon importante na esfuersonan di kooperashon global.

E Grupo di Trabou tokante seguridat di kuminda i kombatimentu di hamber a interkambiá di opinionnan tokante temanan manera ‘menasa i retonan pa seguridat di kuminda dor di kambio di klima’. E reunionnan a evaluá tambe e programa di invershon di EU-LAC Global Gateway establesí pa Latinoamérika i Karibe, ku un suma di asta 45 mion euro te na 2027, ku ta dirigí na e transishon tripel, digital, ekológiko i sosial, i tambe e nesesidat di krea mekanismonan pa sigui i kontrolá e implementashon di e programanan di invershon akí.