UTRECHT—E ola di bankarotanan pronostiká no a yega. Den oktober un kantidat di 292 kompania a sera nan porta.

Esaki ta 4 menos ku den sèptember segun sifranan di CBS. E kompanianan ku a bai bankarota ta prinsipalmente den sektor di komersio i konstrukshon. For di ougustus 2021 e kantidat di bankarotanan ta subi leve. No tin un ola apesar di reseshon ekonomiko ku Hulanda ta konfrontando. E oumentonan di interes di banko sentral Oropeo no ta parse di tin un efekto direkto riba e bankarotanan. Meta di e oumento di interes ta pa fria ekonomia i frena inflashon. E echo ku no tin oumento di bankarotanan no ta nifiká ku no tin kompanianan den problema. Hopi kompania tin debe na belasting. Medio oktober fiscus a anunsia ku kasi 27.000 kompania tin ku paga e debe di corona ainda i ku nan ta bai kobra. Durante corona kompanianan a haña posponementu di pago di belasting. 400.000 empresario a hasi uso di esaki. Por a paga e debe den terminonan. E kompanianan ku no a paga ainda, por spera durwarder.