Curoil tabata na e sitio pa asina por a hasi investigashon.

Willemstad— Despues di a hasi un investigashon na e sistema di gas ku tin instalá na e kasnan na Hòfi Moonchi ku ta keda den e bario di De Savaan a bin deskubrí ku tin eskape di kas na sigur tres parti di e instalashon.

Tabata den oranan di mainta ku un dama habitante di e kasnan na Hòfi Moonchi ku ta pertenesé na FKP a bati alarma ku mester a tuma un eksploshon den e bibienda unda e ta biba ku su yunan. E dama a splika ku e tabata  hasiendo uso di e stof den su kas ora  ku nan dado momento e la tuma nota di un eksploshon kual a saka basta kandela. Segun e dama mesora e la logra di sera e kranchi di gas pa despues a habri bentana i porta pa asina e gas por a sali. Despues di einan a drenta den kontakto ku Polis i tambe personal di FKP pa ku e situashon.  Segun e dama tabata personal di Brantwer ku a tuma kontakto kuné pa asina wak kiko presis a pasa. Dado momento habitantenan di e kompleho  na Hòfi Moonchi a bin trese vários denunsia dilanti pa ku e situashon di e kasnan. A trese padilanti ku nan ta paga hür di e bibiendanan pero FKP mes no ta hasiendo nada. Tur loke ku mester wòrdu drecha na e bibiendanan  FKP ta bisa nan ku ta nan mes komo habitante mester drecha esakinan. Esaki a pone ku mas despues ku personal di FKP a presentá na e kompleho di bibienda i despues di un kontròl korto a pone e habitantenan na altura ku ta e personal di Curoil mester presentá pa asina nan kontrolá e instalashon di gas. Esaki a pone ku sigur un habitantenan rabia i a blòkia e vehíkulo di e personal di FKP ku tabata na e sitio pone ku e no por a sali bai. Despues di basta deliberashon a bin logra ku e personal di FKP por a bandoná e sitio. Mas den oranan di atardi personal di Curoil tambe e presentá pa asina por a hasi un kontròl na e instalashon di gas unda a bin deskubrí ku  na sigur tres di e konekshon di e kasnan tin lekage. Pa seguridat a opta pa sera e konekshon di gas pa evitá ku algu di lamentá por pasa. Esaki a pone ku e habitantenan no a keda masha kontentu unda tabata reklamá kon ta hasi kushina awor i ku tambe kon ta hasi traha lechi pa e yunan mas chikí ku ainda ta bebe lechi. Loke ku mas a pone e habitantenan rabia ta ku na momento ku nan a bin tende ku Aqualectra lo bai deskonektá tantu awa i koriente ya ku tin debe atrasá.  Kosnan a bin eskala i e habitantenan a pidi presensia di señor Con di FKP pa asina e bin  duna un splikashon di loke tabata  tumando lugá. Mas den anochi señor Con a presentá i tambe Parlamentario Ana maria Pauletta, Minister Cijntje i tambe Minister Cooper. Un trahadó di Curoil ku tabata na e sitio a splika ku ya nan a kuminsá kontrolá e liña nan di e konekshon di gas i a topa ku lekkage pero mirando ku a bira anochi awe lo regresá ku mas trahadó pa asina por sigui hasi e kontròl. Esaki na e promé instante no a kai den bon tera serka e habitantenan i Con mester a hasi lo máksimo pa tene e habitantenan trankil. Un di nan asta a vosifera ku e lo bai kome na kas di Con si no remediá e situashon mas lihé posibel. Minister Cooper a primintí e habitantenan ku e mes lo saka sèn for di su saku pa asina kumpra kuminda pa esnan ku tin mester ya ku no tin konekshon di gas pa kushina. Na final a logra di kalma e habitantenan i awe e trabou di kontrolá si tin mas lekage di gas na e kasnan na Hòfi Moonchi ku ta keda na de Savaan lo kontinuá.