Averahe di Kasonan Lokal durante desèmber

Punda—Chèns ta hopi grandi ku sin medida, e kasonan positivo di Covid lo sigui oumentá na Kòrsou. Esaki ta lokual análisis di data ta indikando na momento pone e trènt i desaroyo di Covid durante desèmber den gráfiko.

Apesar ku e kasonan lo sigui oumentá, e peliger di hospitalisashon i okupashon den Kuido Intensivo lo ta ménos kompará na Aprel 2021, momento Kòrsou a drenta den medidanan di “lock down” i Toke de Keda”. E sifranan ta indikativo pa konkluí ku nan aprel 2021 3% dje kasonan aktivo tabata wòrdu hospitalisá, miéntras na desèmber 2021 durante e oumento, 0.4% a resultá den hospital ku ta un diferensha grandi. Esaki sin duda ta debí na mas mihó bakunashon pero tambe efektonan ménos grave di Omicron. Síntomanan leve di  Omicron a hunga un ròl den e bahada di kantidat di hendenan ku ta bai hospital. Esaki ta indikativo no solamente na Kòrsou sino tambe na e.o. Hulanda, Gran Bretaña i Sur Afrika tambe. Lokual ta remarkabel ta ku na Sur Afrika e kota di bakunashon ta mas abou ku Hulanda i Gran Bretaña i tòg e kasonan di hospitalisashon di Omicron ta abou.

Pa lokual ta trata e datosnan, e averahe di kasonan di Covid kalkulá den promedio di 7 dia a sigui oumentá for di 1 desèmber te ku 29 di desèmber último. Anke e sifranan apsoluto a varia for di e averahe, tòg e promedio a sigui oumentá. (Gráfiko 1). Tantu e Averahe Total, Averahe Importá i Averahe  lokal a sigui oumentá ku e Averahe Importá tòg kedando mas abou ku e Averahe Lokal, anke e Averahe Importá a kasi yega esun lokal despues di 26 di desèmber. E oumentonan den kasonan positivo a bira mas haltu durante 15 desèmber te ku 23 di desèmber yegando oumentonan di kasi 30% den kasonan positivo. Na dado momento e trènt di e faktor di kresementu tabata 1.3, pues esaki tabata nifiká oumentonan di 30% diario. Si relatá e sifranan di oumento na e situashon di aprel 2021, lo tabatin por lo ménos 70 persona den CMC for di kual 30 lo tabata den kuido intensivo.

Durante desèmber despues di a yega un máksimo den oumento di 30%, ta notando un bahada den e trènt di e faktor di kresementu na 1.16, kual ta nifikando un oumento di 16% diario kual ainda ta sigui haltu!. Si e trènt kontinuá kombiná ku mesun desaroyo di tèst, Kòrsou por yega na un kantidat di 900 kaso positivo di Covid na final di e promé siman den 2022. Anke, e efektonan severo lo ta ménos kompará na aprel 2021.  Te ainda, medidanan imponé na Kòrsou dor di Gobièrnu tabatin efektividat di baha e nivel di kontagio na Kòrsou. Esaki durante ámbos periodo di Lockdown pero tambe medidanan despues di e.o. Toke de Keda i orarionan komersial i di farándula.