Minister Cooper ke pa parlamento ratifiká e moshon den kual bùsnan chikí i mediano ta kore segun skema di orario.

Willemstad, — Minister Cooper a kompartí den reunion di komishon sentral na parlamento ku ke ratifiká e moshon den kual ta pidi pa bùsnan chikí i mediano tambe drenta den skema di orario.

Minister Cooper a menshoná ku FTAC a saka un rapòrt tokante maneho aktual di toerwagens i a analisá dos aspekto den nos leinan ku a resultá den redukshon òf limitashon di e bienestar di e konsumidó. FTAC a  señalá maksimalisashon di pèrmitnan di toerwagens i maksimalisashon di e tarifanan. Segun minister, FTAC a indiká ku e dos instrumentonan aki no ta pone ku ta bini ku inisiativa pa bini ku un servisio mas kompetitivo i tarifanan mas atraktivo pa e pasahero.

Minister Cooper a indiká ku esaki ta pone ku ta forma un kartèl den kual ta uza tarifanan haltu. Minister a indiká ku e lei aktual no ta duna sufisiente espasio pa otro transportadó subi e merkado i tampoko no ta permití ku turistanan ku ta biaha ku transporte públiko ta benefisiá for di benefisionan ku transporte públiko optimalisá tin pa ofresé.  Pa redusí e tarifanan haltu mester tin kompetishon den e merkado.

Minister di transporte a kompartí ku e moshon di 20 febrüari 2020 parlamento a indiká ku ke saka e sektor for di e krísis ku e ta den. Den e moshon aki a pidi pa duna dispensa pa asina eksploita toerwagens.  Minister Cooper a indiká ku e moshon anterior tabatin oposishon, pero tambe tin transportadónan ku no tabata ke mira kambio. Minister Cooper a menshoná ku e tarifanan ta un proseso importante pa asina mehorá transporte públiko i ku den kaso di transportashon di persona i e tarifanan, ministerio MEO ta enkargá ku esaki.

Minister Cooper a menshoná ku konsiderando despues ku parlamento a deliberá kua puntonan di e lei di Personenvervoer tin ku kambia, ta disidí pa urgí gobièrnu den un proyekto di kambio di lei pa trese tur kambio nesesario unda ta duna pèrmit na bùsnan chikí i mediano i taksi basá riba kondishonnan establesé di un empresa. Tambe ke pa bini ku un sistema den kual bùsnan ta sera un konseshon na esnan ku ta duna pèrmit pa ofresé transporte den kual reglanan di orario di gobièrnu mester keda ankra.

Minister Cooper a menshoná ku mesun kos ku ABC busbedrijf bùsnan chikí i mediano tambe mester drenta den e skema di orario.