Amado Victoria, kende ta trahadó inkansa-bel di e ekipo di ‘Seru’.

WILLEMSTAD—Dirigente i miembronan di e organisashon di Hubentut Fortuna i tambe pueblo di Kòrsou i speshalmente fanatikonan di e deporte rei futbòl riba nos isla, ta pendiente pa e veredikto di e kaso entamá pa ‘Seru’.

Despues ku e tratamentu a tuma lugá algu mas ku 2 siman pasá, ainda un i tur ta pendiente pa e desishon definitivo. Apesar ku un i tur tabata di pensamentu ku ta un kaso fásil i sin ningun duda e komishon enkargá lo yega na un desishon, ainda un i tur ta pendiente. Esaki inkluso ta hasi hinter e situashon aun mas interesante.

Mas aleu, mirando ku ya FFK a hasi publikashon di nan O.O.  ayera for di den oranan di mèrdia , sin ningun informashon relashoná ku e kaso aki, awor ta pensando ku e desishon lo por bira konosí despues di e fin siman di aktividatnan karnavalesko aki.

Un ke otro, apesar ku tabatin rumornan insistente for di inisio di siman, indikando ku e veredikto tabata kla i lo bira konosí un ora pa otro. Pues un i tur ketu bai pendiente pa e desishon definitivo i ofisial den e kaso apelashon entamá pa ‘Seru’ kontra FFK, relashoná entre otro ku e playoff Kaya 3, ku a keda konsiderá kontra reglanan vigente.