Willemstad, — Kolekshon di statistik lo yuda diferente desaroyonan i hisa nos pais riba nivel internashonal.

Ministerio di Gobernashon, Planifikashon i Servisio Públiko mester sòru pa un plan di desaroyo riba tèrmino largu pa Kòrsou. Mirando e limitashon di rekursonan finansiero, esaki lo wòrdu konektá, kaminda ta posibel, ku e golnan sostenibel yamá:  ‘Sustainable Development Goals’ (SDG) di Nashonnan Uni (United Nations). Esaki ta importante pa no keda atras riba desaroyonan ku ta importante pa nos pais. Lo traha riba kordinashon for di e organisashon di esaki den e ‘Sekretariat di Komishon Nashonal’ di Nashonnan Uní pa ‘Implementashon di SDG’ aki na Kòrsou.

Konforme na e polítika formulá den Plan Nashonal di Desaroyo, gobièrnu di Kòrsou a desidí pa pone seis SDG (1, 3, 4, 7, 8 i 14) komo prioridat. Mayoría di e ministerionan ta traha riba temanan ku ta pertenese na SDG 16 ‘Pás, hustisia i servisio públiko fuerte’. Esakinan ta relata na asuntunan publiko manera: identidat legal di personanan i registrashon di nasementu, e organisashon di polítika ku ta traha riba integridat i lucha kontra korupshon, akseso públiko na informashon, desishon representativo, i entre otro e CBS ku ta produsí sifranan independiente i ta traha riba fundashon statistik di tur SDG.

Pa implementashon di e SDG nan ta nesesario pa tin data konfiabel, ku mester wòrdu kolektá i di tal forma wòrdu strukturá i unifiká. Den esaki, CBS ta hunga un ròl prinsipal i kolaborashon ku kontribuidó di dato ta esensial. Senso ta e organisashon intermedio ku ta hasi esfuersonan pa asina por logra kolektá informashon di statistik i entrega esaki na CBS. Ta uza e datonan pa asina por hasi un komparashon ku desaroyonan internashonal pa asina por logra metanan relata na SDG na nivel internashonal.

 Pa por logra e metanan di SDG nan aki na Kòrsou, CBS mester traha intensivamente I internamente ku OWCS, GMN, MEO, SOAW, Hustisia i BPD. Esaki ta nifika ku diferente instansianan lo tin benefisio di e datonan ku wòrdu kolektá. Statistiknan ku ta ser kolektá tambe lo kontribuí na por ehèmpel nos ‘Vergunningenloket’. Ta nesesario pa nos ‘Vergunningenloket’ tin informashonnan di statistik pa asina mehorá e kalidat di servisio kual ta hasi mas fásil pa empresanan hasi negoshi. Por medio di informashon di statistik ku lo yuda nos ‘Vergunningenloket’ lo kontribuí na SDG 8  ‘Trabou husto i kresementu ekonómiko’ na pais Kòrsou.

Pa logra alsa desaroyo di nos pais ta importante pa tin informashon di statistik. E datonan lo yuda pa analisá unda pais Kòrsou falta mehorashon. Koperashon ku Senso i CBS riba esaki ta sumamente importante.