WILLEMSTAD – Den kuadro di vakatura nan “kritische functies 2022” ku Ministerio di Hustisia tin, resientemente Minister di Hustisia Shalten Hato a proponé durante konseho di Minister un komandante nobo pa guiá i liderá e kuerpo di bombero ku a kuminsá awe, 16 di òktober 2023.

Sr. Jair Tromp a keda nombrá komo ámtenar den e funshon komo komandante pa Kuerpo di Brantwer Kòrsou despues di un proseso di solisitut eksitoso for di kual su persona a sobresalí durante di e proseso aki. Sr. Tromp den pasado a fungi komo Komandante General di kuerponan di Brantwer na islanan BES.

Prosedente di isla natal Aruba, na unda tambe su persona a laborá amplio na dje, sr. Tromp ta disponé di un konosementu amplio den e materia di Brantwer i lo ta sigur un atkisishon importante den desaroyo di e Kuerpo di Brantwer Kòrsou.

Komo komandante nobo, sr. Tromp entre otro lo mester sòru pa implementashon di e asina yamá “Plan di Fortifikashon Brantwer” (Verstevigingsplan Brandweer) kual trayekto lo atendé e siguiente áreanan di atenshon:

1. Organisashon i funshon,
2. Areglo di posishon hurídiko,
3. Sistema di formashon profeshonal,
4. Lei i regla,
5. Plan di komunikashon interno i eksterno.

Durante e promé dia di trabou na Brantwer Kòrsou, komandante di Brantwer Kòrsou Tromp a tene un rekorido pa sera konosí ku e instalashonnan di Brantwer, sera konosí ku tantu e personal di kantor i tambe e personal di warda. Adishonal sèktor direktor di Ministerio di Hustisia, sr. Gerold Daantje a hasi entrega ofisial na nòmber di Minister Shalten Hato, e yabi di ofisina, di vehíkulo, unifòrm i demas artíkulonan importante pa funshonamentu di e komandante.

Na final a hasi uso di e oportunidat pa un foto di e tim di maneho nobo di Brantwer Kòrsou. Durante e próksimo dianan lo pasa pa sera konosí ku demas personal di warda i durante siman lo bishitá e instalashonnan di brantwer na aeropuerto Hato i Refineria Isla.

Na nòmber di Brantwer Kòrsou un Bonbiní na Komandante Jair Tromp .