Mientras ku un atleta ta riba pista den práktika, un otro ta na banki sosegando i e rueda di prensa tumando lugá ayera.

WILLEMSTAD—Tereno di Stadion Ergilio Hato na Brievengat, banda di e pista di atletismo, ku diferente atleta di diferente organisashon hibando nan práktika, tabata sede ayera pa un konferensha di prensa. Esaki organisá pa dirigentenan di e ekipo di The Eagles, presidí pa Sidney Valks i di spònser pa RBC.

Un ke otro unda ku den presensia di e presidente di e federashon di atletismo lokal, Willem Cordilia, Valks a hiba palabra i a kompartí informashon di nan próksimo evento.

Esaki lo ta ‘The Eagles Invitational 2024’, ku lo tuma lugá otro siman wikènt ku koperashon di e federashon lokal di atletismo, riba dianan djabièrnè 8 i djasabra 9 mart 2024.

Riba djabièrnè lo inisiá 6’or atardi, mientras ku djasabra ta kuminsá mainta 9’or te ku mitar di 12 i despues di e pouze ta sigui 2’or di trai mèrdia, pa finalisá mitar di 6 atardi.

Lo bai ta kompetensia ku ta konta ku partisipashon di atletanan for di U-7 te ku kategoria senior. E evento aki ta tambe mesora e último oportunidat pa atletanan logra nan límite, ku bista riba klasifikashon pa ‘Carifta Games 2024’, ku lo tuma lugá di 30 mart pa 1 aprel benidero na Grenada.

Tur esaki lo tuma lugá, konhuntamente tambe ku kompetensianan di relevo riba 4x 100 meter, speshal pa studiantenan di skolnan avansá, despues di un eksitoso promé edishon aña pasá. Un ke otro lo tuma lugá djasabra despues di mèrdia.

Entrada ta kosta 5 florin pa adulto i 3 florin pa mucha te ku 13 aña, ku kual bo por sigui e evento, riba ámbos fecha.

Preparando pa Carfita, Kòrsou tin ya 12 diferente atleta kende nan a logra e limit, pa asina por kompetí na Grenada.

Mas aleu tambe a elaborá riba e posibilidat pa práktika atletismo, unda diferente organisashon ta kompartí e instalashon pa sekshonnan di práktika, riba djaluna, djamars i djaweps di 5’or atardi, te ku 7’or di anochi.

E organisashon The Eagles ta konta ku miembronan for di 4 te ku 80 aña di edat.

Deporte Vigilante a kòmbersá tambe ku un miembro di e organisashon, kende a logra su limit pa por ta Grenada próksimamente, kual nos lo kompartí den nos edishon di mañan.