Mainta trempan yegada di outoridatnan na Sta Catharina.

Willemstad, — Ayera mainta netamente e komersiante ku a keda sekuestrá den luna di yanüari pa algun suheto a risibí bishita di un kantidat di outoridat na su kas unda e la wòrdu arestá i hiba pa warda enkonekshon ku un investigashon basta grandi di trafikashon di droga tantu lokal komo internashonal.

https://fb.watch/qNv9RBM7h9/ (Klik pa wak Vidio follow vigilantekorsou.news)

Djamars 12 di mart 2024 den oranan di mainta trempan, e Divishon di Krímen Organisá di Kuerpo Polisial riba òrdu di Fiskal di Ministerio Públiko Kòrsou konhuntamente ku KMar, Duana, Defensi i R.S.T. a tene diferente entrada hudisial na dos bibienda i sinku kompania. Esaki tabata den kuadro di un investigashon relashoná ku trafikashon di droga riba nivel lokal i internashonal. A bai den área di Sta. Catharina, Janthiel, Seri Loraweg, Sta.Rosa, Veeris, Buena Vista i Sta.Maria, i na un di e adrès nan aki a hasi detenshon di e hòmber M.J.A.T., di 41 aña di edat nasé na Kòrsou enkonekshon ku e kaso ariba menshoná.

Na e sitionan a haña i konfiská diferente artíkulo ku ta di importansia pa e investigashon. Investigashon den e kaso aki ta kontinuá i no ta ekskluí ku lo bai tin mas detenshon. A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon. Ta trata netamente e komersiante ku den luna di yanüari a keda sekuestrá na momento ku e tabata na su negoshi den aria di Veeris. E dia ei tres tipo ku arma mester a presentá na e negoshi i a dominá e komersiante pa despues a hink’é den un vehíkulo miéntras ku e tabata wòrdu maltratá. Polis ku a keda pone na altura mesora a bai na e sitio i a pidi asistensia di nan koleganan di e departamentu di e Divishon di Krímen Organisá ku ta esnan versá den investigá kasonan di sekuestro. E tim mesora a kuminsá ku e demas investigashon i no a dura masha ku e mesun dia den oranan di anochi e sekuestradónan a laga e komersiante liber.

For di fuentenan a bin komprondé ku pa laga e komersiante liber mester a reuní algu di plaka pa asina entrega esakinan na e sekuestradónan. Despues ku e komersiante a ser pone den libertat e la duna algun detaye kual a pone ku e tim investigadó mesora tabatin algun pista. Esaki a pone ku a bin tuma nota ku un di e sospechosonan ku tabata envolví den e kaso di sekuestro aki ya a bandoná Kòrsou rumbo pa Hulanda. Esaki a pone ku outoridatnan lokal a hasi petishon na Hulanda pa detené e sospechoso aki kual pa kolmo netamente tabata sera na Hulanda pa algun but. Esaki a bira mas fásil pa e keda detené i wòrdu trasladá bek pa Kòrsou kual a wòrdu realisá. Tambe a tene entrada hudisial na un kas den e bario di Jandoret unda a logra di detené un di e sospechosonan ku su nòmber tabata wòrdu menshoná den e kaso di sekuestro.

Loke ku a bin hala atenshon di e tim investigativo ta ku algun dia despues di e kaso di sekuestro, deskonosínan a drenta den un parti pega ku e negoshi di e komersiante pa hòrta i a logra di bai ku algun artíkulo. Algun dia despues a realisá otro detenshon pa ku e kaso di sekuestro aki den aria di Heerlenstraat. No mas ku siman pasa a bai na un aria alehá den e bario di Sta Cruz na unda a detené otro sospechoso mas pa ku e kaso di sekuestro i tambe e kiebro straño ku a tuma lugá na Veeris. Tin ku remarka ku durante di e investigashon di e kaso di sekuestro e tim investigativo a bin tuma nota di pistanan ku tabatin trafikashon di droga tantu lokal komo pa eksterior unda tabata hasi uso di kònteinernan via di un negoshi di karga lokal. Esaki a pone ku mesora a kuminsá ku un investigashon ku tabata kana paralèl ku e investigashon di e kaso di sekuestro.

Durante di investigashon di e sospechosonan envolví den e kaso di sekuestro a bin saka afó ku  un di e motibu nan di e sekuestro tabata netamente pa pidi plaka ku a ser gana ku trafikashon di droga hasiendo uso di kònteiner. Segun fuentenan ku ya den pasado a yega di ekstorna e mesun komersiante aki na unda e lo mester a entrega sumanan di plaka i tambe otro kos mas a kambio di su trankilidat. Últimamente esaki tambe tabata e kaso ora ku via di un hòmber ku ta bida den eksterior mester a pone preshon riba e komersiante pa entrega sumanan di plaka i na momento ku e komersiante a ninga di entrega plaka a manda un grupo bin sekuestr’é. Ku henter e historia aki kier ilustrá ku ta netamente durante investigashon a bin dal den puntonan ku tabatin trafikashon di droga na gran eskala hasiendo uso di kònteiner pa eksterior.