Willemstad – Durante un konsulta tripartit ku partnernan sosial riba 18 di aprel 2024, minister Ruthmilda Larmonie-Cecilia di ministerio di Desaroyo Sosial, Labor i Bienestar (PNP) a kompartí resultadonan di un investigashon amplio di e sistema di siguridat sosial.

E investigashon aki a tuma lugá den kuadro di e Pakete Nashonal (Landspakket) i e ta trata e aspektonan mas importante di e sistema di seguridat sosial na Kòrsou. E investigadornan a presentá e resultadonan di nan análisis i e rekomendashonnan. Despues di esaki e representantenan di empresarionan i trahadónan a duna nan promé reakshon i a hasi algun pregunta. A trata di un kombersashon habrí i konstruktivo. Den e simannan benidero e organisashonnan di dunadónan di trabou i di empleadonan lo risibí e rapòrtnan pa nan studia nan i diskutí ku nan mes grupo. Despues lo sigui ku e konsulta riba e proposishonnan den e konsultashon tripartit Diálogo Nashonal, ku e meta pa yega na un opinion amplio pa Konseho di Minister.

Minister Larmonie-Cecilia a invitá e partnernan sosial pa traha huntu kuné pa yega na un sistema di seguridat sosial, sigur i sostenibel.