WILLEMSTAD – E Komishon Temporal Hòspital Nobo Otrobanda di Parlamento di Kòrsou (Komishon Enkuesta HNO) ta bini huntu djabièrnè próksimo for di 10’or di mainta, durante un reunion di Komishon Sentral pa preparashon di trabounan dje komishon.

E komishon akí ta konsistí di miembronan di Parlamento Eduard Braam di frakshon di MFK (Presidente), Giselle Mc William di frakshon di MAN, Gwendell Mercelina di frakshon di PNP, Ana-Maria Pauletta di frakshon di PAR, Rennox Calmes di frakshon di TPK i Michelangelo Martines di frakshon di KEM.

E komishon ta determiná pa haña sa kon a tuma e desishonnan pa traha un hòspital nobo. Den lunanan binidero lo studia dokumentonan i skucha esnan embolbí, pa haña sa e bèrdat tokante desishonnan tumá. Pa skucha opinion di komunidat ta pone dos enkuentro públiko. Tambe a lansa un enkuesta pa públiko.

Ketu bai ta relevante pa envestigá kon a tuma desishonnan, ora a disidí di konstruí un hòspital nobo na Otrobanda. For di 2018 un mayoria den Parlamento tabata haña esaki. Miembronan di Parlamento e tempu ei a disidí e or’ei pa hasi uso di e derecho di investigashon (enkuesta). A lanta e komishon, ku a haña e tarea pa investigá 5 tópiko.

Ta trata entre otro e desishon pa traha e hòspital na un otro sitio. Tambe lo buska pa sa kon a tuma e desishonnan den gobièrnu i e transishon di e hòspital bieu pa esun nobo. E komishon ta konsistí di 6 miembronan di Parlamento i ta risibí sosten di un tim di spesialista. Tres sientífiko ta repasá tur e dokumentonan. Huntu ku e ta disidí ken ta yama pa aperesé dilanti e komishon pa duna mas informashon.

Tin tambe un asina yama ‘klankbordgroep’, ku ta konsehá e komishon. E grupo akí ta konsistí di Arjan Vliegenthart (direktor di Nibud), Marcel Levi (presidente di NWO), Lodewijks Rogier (un eksperto riba tereno di lei) i Eline Altenburg-Van den Broek (ekonomista riba tereno di salubridat i epidemiólogo). Ta embolbí siudadanonan di Kòrsou tambe den e investigashon. Ya komo ta ku plaka di pueblo a traha e hòspital, a duna oportunidat na komunidat pa ekspresá nan mes riba 2 di desèmber 2023 durante dos enkuentro. Tambe tin un enkuesta pa públiko kaminda komunidat por duna nan opinion tokante e trabou dje komishon. Pa yega na enkuesta por hasi uso di e lenk digital https://survey.deloitte.com/jfe/form/SV_e3WCBk7LAwyTngO pa yega na e preguntanan. Na mart/aprel 2024 e komishon ta spera di entregá e raport final.