AMSTERDAM—Komishon Oropeo ta kere en prinsipio ku Hulanda ta keda miembro di Union Oropeo despues di viktoria di PVV den elekshonnan.

Partido PVV di Wilders semper a papia di salida di Hulanda for di Union Oropeo (nexit). Nos ta keda konta riba e partisipashon fuerte di Hulanda den Union Oropeo segun un bosero di e komishon. PVV, ku a bira e partido mas grandi den Tweede Kamer aktualmente i posiblemente lo tin un premier, pa basta aña ta boga pa salida di Hulanda. Komishon Oropeo no ta kere ku elekshonnan den kualke pais miembro di Union Oropeo ta nifiká duda den e miembresia. Hulanda ta un dje fundadonan di Union Oropeo i komo tal un pais miembro fuerte. Tòg e no ta bira mas fasil si Hulanda den futuro keda representá na Brussel pa premier Wilders, fuentenan na Union Oropeo a konfirmá. Pero nan no ta masha preokupá. Un fuente den tòp di Union Oropeo ta indiká ku e miedu pa Meloni di Italia tambe tabata grandi den 2022, pero ku esaki no tabata nesesario. Meloni a moderá su opinionnan euroseptiko.