Bullenbaai–  E kompania, United Petroleo Corporation te na e momentonan aki ta doño di un kargamentu di 600 mil bari di Fuel Oil. Ta trata di e kargamentu di Fuel Oil, ku Bullenbaai a almasena komo nan promé kargamentu kordiná pa Caribbean Petroleum Company.

Segun un konseho hurídiko prosedente di e bufete, InterJuris na Miami, UPC a risibi e kargamentu di fuel oil, komo pago di un debe. UPC ta un kompania di Panama i ta doño di e kargamentu. Pero, pa UPC por a logra pone e fuel oil den tankinan na Bullenbaai, nan a uza e kompanianan CRU di Kòrsou, Caribbean Petroleum di Kòrsou i un kompania mas, Knob Trading SA, KTSA.

For di e konseho hurídiko di e abogadonan na Miami, e krudo ku UPC a risibi no tabata propiedat di Venezuela ni tampoko di PDVSA, sino tabatin un kambio den propiedat na momento a transferí e kargamentu for di teritorio venezolano. Ademas PDVSA tabata debe UPC, pa un suma deskonosí, pero e kargamentu a kanselá parti di e debe.

For di e struktura por konkluí ku e kompania UPC, registrá na Panama a traha ku kompanianan di Kòrsou pa saka krudo for di Venezuela den un struktura di debe. Gobièrnu di Kòrsou ni tampoko Parlamento di Kòrsou, no tabata na altura di e struktura i no ta konosí si a laga hasi un “compliance report” riba e kompania panameño, promé di e laga un kompania estatal di Kòrsou traha kuné.