Ghanim Bin Saad, direktor Oryx.

Punda— Oryx Petroleum tambe ta interes den Bullenbaai. E terminal di tanki petrolero na e momentonan ta liber di hür i konseheronan di Oryx a opta pa tuma opshon riba Bullenbaai. Tur kos ta dependé riba tres konseho final ku Oryx lo laga ehekutá.

Maneho di Oryx na Bullenbaai, ta nifiká, kontrali na grupo CPR, ku un kompania serio bou di maneho renombrá internashonal ta fasilitá mihó negoshi. Por ehèmpel, e kompania estado unidense Chevron ta transbordando krudo venezolano pa Estádos Unídos, sin ta uzando e fasilidatnan di Bullenbaai. Esaki ta lokual por konkluí for di informenan internashonal prosedente di Reuters. Segun Reuters, Estádos Unídos/Chevron ta mandando kargamentu di krudo pa Estádos Unídos pa rafiná. Ta trata di e.o tènkernan Amalthea bou di bandera griego i Caribbean Voyager bou di bandera di Bahamas. Amalthea ta subiendo ku kargamentunan di 250 mil bari di krudo miéntras Voyager ya ta hasiendo entrega di 500 mil bari di krudo.

Pero for di investigashonnan di Reuters, Caribbean Voyager ta uzando e sistema di STS, “Ship to Ship” transferensha, lokual ta indikativo ku Chevron ta desviando posibilidat di uza Bullenbaai komo opshon di transborde. E transborde di barku pa barku ta sosodé den awanan di Aruba unda por ehèmpel barkunan manera Caribbean Voyager ta tuma e krudo for di un otro tènker, manera Scaleo. E motibu dikon Chevron ta apliká e sistema di STS, ta pasobra ta demasiado riskante pa laga e tènkernan grandi drenta awanan plat pa kargamentu for di e refineria. Entretantu, Chevron a súplika gobièrnu venezolano pa koba e laguna pa nan barkunan por drenta.

Chevron ta optando pa bai STS. Chevron na novèmber último a risibi un lisensia ofisial di OFAC pa por eksportá krudo for di Venezuela. E kompania ku Kòrsou a skohe, CPR, no tabatin e lisensia aki. Refineria di Kòrsou a skohe pa un kompania transborde di petroleo, sin tabatin lisensia di OFAC. Chevron a bin konfrontá problema debí na awanan plat pa nan tènkernan grandi yega e refinerianan en kestion. Caribbean Voyager por ehèmpel mester para pafó den awanan di Aruba pa por permití un otro tènker trese e krudo pe. Esaki ta un proseso kostoso. Pero tòg te ainda Chevron no ta mirando e posibilidat di uza Bullenbaai ku na e momentonan aki ta liber di kontrakt.

Ku presensha di Oryx e situashon ta mustra otro. Ademas e kompania ku tin un akuerdo pa produsí asfalt na Isla, Global Oil Management tambe a inisiá e proseso pa un lisensia OFAC unda ta permití nan di trese krudo Kòrsou.