Oumentá: tráfiko riba wepsait ku ta promové prostitushon digital ta oumentá i bira mas organisá na Kòrsou.

Hato—E konekshon aéreo entre Kòrsou i Venezuela ta trese turismo di estadia, pero alabes turismo di prostitushon. Damanan bunita ku ta baha na Hato, ta drentando un sirkulo di prostitushon bon organisá unda hasta via di wepsait nan ta bira lokalisabel.

Despues di kada buelo ku baha na Hato, for di Venezuela ta nota presensha di e “damanan turista” ku for di yegada tin nan organisashon logístiko bon organisá. Shofùrnan ya ta apuntá pa kore hiba e damanan na diferente adrès, prinsipalmente den orea serka di Hato den por ehèmpel Dein Ganga i Sta Maria. Mayoria ta kompleho di apartamento unda e damanan ta paga pa hür i for di einan ta subi wepsait pa “post” nan fotonan i dato di kontakto, inkluso number di telefon.

Klientenan lokal, kende tuma kontakto ku e “damanan turista” ta risibi nan adrès unda tin opshon pa duna servisio den kamber di e apartamento of servisionan mas den pakete, unda e damanan por sali tambe pa un otro adrès, den forma di “escort”.  Pero no ta solamente kliente lokal ta tuma kontakto ku e “damanan turista”, sino bishitantenan maskulino for di e.o. Estádos Unídos i Canada tambe ta gustando Kòrsou pa e.o. e aksesibilidat di tin un amiga latino amerikano. Pa por yega na e wepsaitnan, e kliente turista òf kliente lokal ta “google” escorts Curaçao. Tin un kantidat di wepsait ku ta ofresé servisio di prostitushon “online” i mayoria dama riba e wepsait ta di Venezuela pero tambe tin di Colombia, pero ménos.

E entrada di e “damanan turista” a bira mas fásil despues ku e sistema pa optené un visa a bira mas mihó organisá.  Pa islanan ABC, Hulanda tabatin un restrikshon di visa for di Venezuela. Solamente 200 turista venezolano tabata por drenta pa luna, despues ku e fronteranan a habri. Pa Kòrsou entrada di turista venezolano tabata limitá. Gerensha di kompanianan aéreo ku kier a bula entre Kòrsou i Venezuela tabatin nan man na kabes apesar di tur nan intentonan pa por trata na logra haña biaheronan entre Venezuela i Kòrsou. Esei entretantu ta posibel, pero e ta trese e dolónan di kabes.

E damanan turista ta drenta Kòrsou i ta kuminsá traha den sírkulonan di prostitushon. No solamente riba wepsaitnan, sino tambe den barnan lokal, kual tin algun ku semper a keda aktivo. Na Aruba tambe, prostitushon online di damanan venezolano ta hopi aktivo i organisá.

Via laman riba botonan klandestino tambe tin e “damanan turista” ta drentando. E situashon einan ta ménos kontrolabel, miéntras organisashonnan humanitario tambe ta vigilando e situashon di emigrantenan venezolano i nan tratonan risibi. Diferente eksperto legal na Hulanda ta konsiderá e situashon ‘deplorabel’ i kontra derechonan humano. Relashoná ku pobresa i violensia, miónes di Venezolano a laga nan pais durante e último añanan. E mayoria ta bai paisnan bisiñá, pero tur aña tambe tin personanan ku ta intentá di yega Kòrsou via laman. Aña pasá Wardakosta di Karibe a raportá 59 hende. UNHCR ta kalkulá ku aktualmente tin 14 mil Venezolano sin pèrmit di residensia bibando na Kòrsou. Asina Kòrsou ta un di e paisnan den mundu ku ta aseptá mas migrantenan pa kabes di habitante. Organisashonnan di derechonan humano ta referí na fayo den e sistema di asilo (“opvang”), pero no tin kambio fundamental. Amnesty International ya a traha un rapòrt na 2018riba e falta di protekshon pa Venezolanonan na Kòrsou. E organisashon no a mira kasi “ningun mehorashon” na 2023. Pero lokual tambe ta oumentando ta presensha di prostitushon venezolano na Kòrsou.