Sirvin Keli: Inspekshon di Salubridat Públiko a ordená SOAB pa investigá e benifisionan si Kòrsou sigui lisensia su bandera na barkunan di peska.

Mundo Nobo—Un problema den entendimentu entre MEO i GMN, ta kousando un problema pa Kòrsou por inisiá un proseso faktibel pa eksportá su piská(nan) pa merkado oropeo. Na e momentunan aki tin diferente grupo, tantu oropeo komo lokal, kla start proyekto di eksportashon di peska. Pero un problema di lisensia, ta formando un opstákulo.

E problema ta na Servisio di Salubridat Públiko. Miéntras di parti di e Servisio di Salubridat, Kòrsou a keda sintá, Departamento di Asuntunan Ekonómiko a kumpli ku tur eksigensha pa keda miembro di ICCAT i demas organisashonnan internashonal, pa lokual ta trata asuntunan di peska internashonal.  Na e momentonan aki, debí na e negligensha di parti di Salubridat Públiko, Kòrsou no por entrega ningun piska òf produkto di peska na Union Oropeo. Esaki ta bálido pa tur barku piskando bou di bandera di Kòrsou pero tambe pa karga di peska ku mester sali di Kòrsou pa Union Oropeo.

E proyekto ku Kòrsou tabatin pa permití barkunan spañó piska bou di nos bandera ta den problema serio. E problema a kuminsá despues ku Kòrsou no a pasa e ouditorio di EU, Union Oropeo. Ta trata di un diskushon di hopi aña entre MEO i GMN, kual a pone ku GMN, Departamentu di Salubridat di Kòrsou no a kumpli ku e ouditorio.  Kòrsou ta koriendo riesgo grandi di pèrdè e sosten di Union Oropeo di por laga e barkunan sigui piska bou di bandera di Kòrsou. E barkunan tabata paga Kòrsou pa uzo di e lisensia pero tambe kada biaha nan subi reda tambe tabata paga Kòrsou un kota. Union Oropeo di nan banda ta eksihí Kòrsou pa mantené nan mes na kondishonnan stipulá. Pero e biaha aki si e konflikto entre MEO i GMN no a solushoná, lokual a pone ku GMN no a kumpli ku e ouditorio di Union Oropeo. E barkunan ta piska prinsipalmente pafó di kosta di Sur Afrika unda tin kama grandi di e.o. buni (Tuna) ta traspasá. Pero miéntras no pasa e ouditorio, peska lokal i hasta esnan ku kier kumpra piska for di Venezuela pa eksportá pa Union Oropeo ta keda limitá.