E outor di e krímen a keda identifiká i ta keda buská.
BOGOTA – E feminisidio di un hóben di 14 aña, kende su kurpa sin bida a keda hañá na diferente pida den un negoshi mekániko di e siudat di Cali, a kousa konmoshon na Colombia, unda outoridatnan ta en buska di e responsabel, kende ya a keda identifiká.
E echo, segun a keda detayá, a sosodé den oranan di djaweps siman pasá ora e menor di edat a keda mandá pa su tata pa kumpra kos.
Tabata na su regreso pa kas, ku el a keda hibá na e negoshi, aparentemente gañá.
Outoridatnan na e sitio a bin topa ku e kurpa sin bida di e menor, kòrtá i separá den diferente baki di warda èrmènt. E persona ku a kometé e krímen a keda identifiká komo Harold Echeverry i ta ofresé un rekompensa di 100 mion di pero , masoménos 25.000 dòler, pa informashon ku por kondusí na su detenshon.
E kaso aki a kousa un rechaso i konmoshon na Colombia, pa e forma ku e kriminal a aktua.
E alkalde di Cali, Jorge Ivan Ospina, a manifestá ku henter e siudat ta mobilisá pa ubiká esun responsabel.
Di otro banda, tata di e víktima, Genaro Gonzalez, a indiká ku su yu apénas a kuminsá biba i e tabatin hopi idea, proyekto i plan pa su bida. El a indiká ademas ku su yu tabata un persona alegre i semper ku un sonrisa riba su kara.