Konseho Supremo Elektoral ta pendiente pa kuminsá ku prepará pa elekshon nan di 2025.

WILLEMSTAD, — Konseho Supremo Elektoral lo funshoná mas independiente promé i durante elekshon di 2025. E proseso di independensia tin su retonan si por ehèmpel un bon preparashon.

For di na fin di 2020 Kòrsou Konseho Supremo Elektoral a bira un órgano independiente i den e kuadro ei a organisá e promé elekshon komo órgano independiente na 2021. Pa elekshon di 2025, Kòrsou Konseho Supremo Elektoral lo ta mas independiente ainda pasombra lo tin un konstelashon kompletamente nobo.

 Mayoria di e miembronan ku tabata forma parti di e Konseho Supremo Elektoral no tei mas pa diferente motibu por ehèmpel, nan edat i tambe tabatin otronan ku no tabata disponibel mas. Pa ku esaki a hasi henter un proseso di solisitut i a hasi e trámitenan pa asina yena e vakaturanan pa un Konseho Supremo Elektoral kompletamente nobo. Ta spera ku pa 2025 esaki ta kompletamente kla pa asina formalisá e elekshon di 2025.

Den Konseho Supremo Elektoral tambe tin diferente otro aspekto ku ta di importansia ku ta e trabounan ku tin ku hasi pa elekshon 2025. Lo tin un sekretaria ku ta hasi tur e trabounan di preparashon den e konstelashon nobo. Esaki ta enserá ’ kantidaat stelling’, dia ku ta entregá lista, preparashon di e büró di voto, kompra di tur e karton ku ta uza pa traha e ‘stemhokken’ , e instalashon di e sistema pa kolekta datonan, i tambe papia ku diferente partido polítiko.

Ta tuma mas o ménos 9 luna pa hasi e preparashonnan pa elekshon. Ta importante pa e konstelashon nobo ta bon prepará i tin sufisientemente tempu pa organisá i prepará elekshon di 2025. Tambe mester prepará públiko riba e proseso di votamentu, i tambe por ehèmpel kiko tur mester trese i na unda mester vota.  Den e konstelashon independiente ta nifiká ku tin hopi responsabilidat pa organisá i prepará e elekshon di 2025. Tambe tin e parti internashonal di hendenan di afó ku ta kontrolá pa wak si e proseso aki ta kana transparente i direkto.

Den e di dos kuartal di aña 2024 lo kuminsá ku tur e preparashonnan ofisial i lo informá públiko mas aleu tokante di esaki. Gobièrnu di Kòrsou aktualmente a presupuestá un suma di 2 mion florin pa kuminsá ku e preparashon nan den 2024. Pero e prespuesto pa 2024 no a keda tratá ainda den parlamento di Kòrsou.