Vèn ku a transportá e 600 kilo riba 14 di òktober 2018

GARIPITOWEG— Definitivamente, e robo di 600 kilo na Warda di Polis riba14 di òktober 2018, tabata un inside job. Informenan konkreto ta señalá ku un miembro di kuerpo di polis, konsientemente a laga e kandal/slòt dje porta di heru habrí unda e 600 kilo tabata wardá. E informashon tabata konosí na Landsrecherche.

Manera ta konosí na òktober 2018 un kantidat di 600 kilo di kokaina pa disparsé for di Garipitoweg. Ni ku asistensha tékniko for di Hulanda i separashon di investigashon te den Kuerpo di Marina, no a logra solushoná e kaso di 600 kilo di kokaina ku a disparsé for di warda di polis. E robo ku a aki bou di maneho di eks minister Quincy Girigorie, no a eksihí kabes dje minister ni tampoko mando polisial e tempu ei. Kasi 5 aña despues, ainda no a logra solushoná e kaso miéntras niun instituto ni tampoko persona a asumí responsabilidat pa e robo mas bergonsoso den historia di Kuerpo di Polis.

E investigashon a pasa tambe den diferente unidat. Na promé lugá reshèrshinan tékniko tabata investigando e kaso pa despues minister di hustisia i prokurador general manda e kaso pa reshèrshi Nashonal, kende a traha un lista di por lo ménos 25 kandidato sospechoso pero tampoko no tabata por a logra trese un solushon. I na 2020, a opta pa pone e investigashon di man di RST, ku nan turno a manda un unidat speshal di reshèrshinan ulandes oropeo sinta te den kazèrne na Parera pa eskivá eventual influensha lokal. E kaso te awe a sigui sin solushon.