WILLEMSTAD—-Gobièrnu di Kòrsou ta keda pone énfasis riba konsientisashon di su pueblo pa ku preparashon den kaso di un kalamidat.

Den e kuadro aki Direktorado di Kontròl di Riesgo i Maneho pa Kalamidat a organisá e ‘Prepare NOW Expo’,  ku ta tuma lugá riba dianan 21 i 22 di aprel próksimo na Sambil. E expo aki ta konsentrá riba preparashon den kaso di kalamidat i ta konta ku partisipashon di e diferente organisashonnan ku ta forma parti di e Organisashon pa Kontròl di Kalamidat (CRBo)

Durante di e expo por konosé i presensiá presentashon di e organisashonnan ku ta forma parti di e Organisashon pa Kontròl di Kalamidat manera entre otro Kuerpo Polisial, Brantwer, Defensa, Ministerio di Desaroyo Ekonómiko. Huntu ku esaki tin tambe oportunidat pa komunidat por partisipá na seshonnan informativo riba tereno di prevenshon di kalamidat. Di e forma aki kada partisipante por amplia no solamente su konosementu pero tambe haña instrumentonan ku ta yuda baha e riesgonan personal den kaso di un kalamidat. Tur esaki pa hasi nos kada un mas resiliente.

E expo ta keda inougurá pa Minister di Asuntunan General i Promé Minister, Gilmar Pisas riba djabièrnè 21 di aprel. Parti mainta Direktorado di Kontròl di Riesgo i Maneho pa Kalamidat ta invitá skolnan, pa yuda konsientisá nos muchanan ribe tereno aki. E expo ta aksesibel pa públiko riba 21 i 22 di aprel for di 10’or di mainta pa 8’or di anochi na Sambil i partisipashon ta grátis pa pueblo di Kòrsou. Nos ta warda un i tur!