WILLEMSTAD – Un di e 10 rekomendashonnan di Kontraloria General pa loke ta trata redusí gastunan di overtaim denter di Kuerpo Polisial Kòrsou, ta pa minimalisá e riesgo ku e personal di seguridat di e mandatarionan ta traha overtaim innesesario.

Den e kuadro akí, Kontraloria ta rekomendá pa preskribí ku pago di overtaim por tuma lugá solamente sí tabatin un notifikashon òf òrdu di KPC, duná di antemano. Mester palabrá ku e otro ministernan, ku lo paga overtaim pa seguridat mas haltu ku e nivel básiko solamente sí Fiskal Mayó konfirmá ku ta eksistí un nesesidat pa brinda seguridat na e nivel ei. Sí ta posibel, mester laga e personal di seguridat traha konforme rotashon. Mester raportá e oranan i gastunan di overtaim regularmente na e ministernan i palabrá ki yabi di repartishon lo apliká pa asigná e gastunan akí na e ministerionan korespondiente.

Segun Kontraloria General, informashon i asignashon di gastu riba un base regular lo kontribuí pa e ministerionan disidí na un manera mas konsiente sí nan lo laga personal di seguridat traha overtaim òf nò. Akí ta sigui e siguiente 6 rekomendashonnan di Kontraloria General. Na di 5 lugá Kontraloria ta splika ku, unabes minimalisá e riesgo di overtaim evitabel i innesesario (di akuerdo ku rekomendashon 3 i 4, minimalisá riesgo di overtaim i seguridat di mandatarionan), loke lo sobra ta tratamentu di overtaim ku berdaderamente ta inevitabel. Kontraloria ta rekomendá pa atendé e kousanan di e overtaim inevitabel, pa asina por limit’é. Pa logra esei, lo mester averiguá kon por oumentá e nivel di personal disponibel.

“Te kon leu e nivel aktual di uso eksterno di fte ta nesesario? Meskos ta konta pa e uso di fte pa trabou ku no ta kuadra ku nan tareanan original? Kon por minimalisá e inaktividat di e kolaboradónan (ku eksepshon di e aspirantenan ku ta studiando)? Kiko ta e kousanan di e nivel haltu di ousensia pa motibu di enfermedat? Por mira un relashon, pa kada kolaboradó, entre ousensia pa motibu di enfermedat i overtaim? I ki medida por tuma pa baha e ousensia pa motibu di enfermedat te na un nivel aseptabel? Un ehèmpel ta, mihó chekeo médiko. Esaki lo por redusí mèldumentu malu bastante. Sinembargo, mester hasi e investigashonnan nesesario i asina haña kontesta pa e preguntanan akí promé.”

Kontraloria General ta rekomendá tambe pa tuma medida pa por programá personal disponibel riba roster na un manera mas fleksibel. Mester hasi esaki, sin ku e oranan di trabou i di deskanso fihá den lei afektá buena marcha di e trabou. I studiando maneranan pa usa e personal disponibel di mas den sierto departamento, den e departamentonan ku ta enfrentá falta di personal. Na di 7 lugá, Kontraloria ta rekomendá pa evaluá sí e tarifanan di overtaim apliká for di 2004 ta aseptabel ainda i sí mester formalisá nan. Of si mester introdusí un sistema nobo pa kompensashon di overtaim ku ta hasi trahamentu di overtaim ménos atraktivo.

Otro rekomendashon (number 8) ta pa pèrkurá pa Kuerpo Polisial Kòrsou raportá regularmente na Minister tokante e oranan di overtaim realisá, i tambe kon nan ta relashoná ku e kasonan di mèldumentu malu ku tabatin. Lòs di esei ta rekomendá (na di 9 lugá) pa formulá un plan di aserkamentu di akuerdo ku e prinsipio SMART, ku ta inkorporá e kousanan konstatá i e rekomendashonnan menshoná. “Mester presentá e plan akí na Parlamento i duna informashon regular tokante e progreso lográ, entre otro indikando e gastunan di overtaim, kon e gastunan ta kompará ku presupuesto, kuantu ora di overtaim a realisá pa luna (na tur i pa kolaboradó), i kon e overtaim ta relashoná ku e kasonan di mèldumentu malu ku tabatin i e manera ku mèldumentu malu a bini ta desaroyá.” Finalmente Kontraloria General ta enfatisá ku den práktika, ta maneho di Kuerpo Polisial ta esun ku na promé lugá lo mester ehekutá e medidanan akí pa kombatí e kousanan. “Ta rekomendá Minister di Hustisia pa pèrkurá ku tin sufisiente apoyo pa esaki na nivel atministrativo, ya ku di otro manera, ehekushon di e medidanan lo no ta posibel.”