Edgar Crestian (Presidente KEP) i Mavis Hous (Vice presidente KOBATA) a firma e akuerdo huntu ku Riles Felicia (Sekretario KEP) i Raphael Regales (Tesorero KOBATA).

WILLEMSTAD, Kooperativa KEP i Kooperativa Bankario, Trust i Aseguro (KOBATA) resientemente a firma e akuerdo pa KEP tuma over KOBATA, pendiente aprobashon final di Banko Sentral di Kòrsou i Sint Maarten (CBCS) den próksimo simannan.

Na momentu ku Banko Sentral di Kòrsou i Sint Maarten (CBCS) duna su aprobashon lo kuminsá traspasá aktivá i sierto pasiva di KOBATA pa KEP. Ta trata di 275 sosio ku lo pasa over ku entre otro nan akshonnan pa KEP. Ademas KEP a tuma over e portafolio di fiansa for di KOBATA. Miéntras KOBATA lo terminá relashon di trabou ku e dos trahadónan ku nan tin, KEP lo ofresé nan un kontrato nobo di trabou. 

KEP for di 2015 a habri posibilidat pa tur persona for di 18 aña ku tin un trabou i ku ta biba na Kòrsou por apliká pa bira miembro di e Kooperativa. Esaki por di forma digital via di www.kep.cw. Den un periodo di dos aña KEP a yama bon bini na mas ku di 340 miembro nobo i lo sigui konta ku mas miembro den próksimo añanan. Meta ta pa na final di 2024 yega un total di 3000 miembro.

KEP for di 2023 a wòrdu aserka pa KOBATA pa sondia e posibilidat pa tuma e kooperativa i pa eksplorá huntu den kua forma hurídiko esaki lo ta mas apropiá . E dos Kooperativanan a  lanta un komishon ku a hasi e trabounan di sondia tur posibilidat hurídiko i finalmente e direktivanan a skohe pa e asina yama ‘overname’ ku ta kumbiní ámbos partido.

Ku aprobashon di Reunion General di ámbos Kooperativanan i bou di supervishon di CBCS a kana e trayekto aki e último lunanan. CBCS den kurso di siman nan benidero lo tuma un desishon en kuantu aprobashon di e petishon di KEP pa tuma over KOBATA.  KEP ta sumamente kontentu ku CBCS a depositá nan konfiansa den e Kooperativa i esaki ta ilustrá e bon trabou ku KEP ta ehersiendo manera nan lema ta bisa di un forma Sólido i Konfiabel.

Finalmente KEP ke gradisí Direktiva, trahadónan i sosionan di KOBATA pa e konfiansa depositá den e Kooperativa.