Mike Alexander ayera ta huramentá den Parlamento di Kòrsou durante enkuesta

Punda—Despues di tres dia di preguntanan sin e kontestanan asertá, ta indikativo ku Kòrsou a tuma demasiado tempu pa inisiá un Enkuesta Parlamentario riba HNO/CMC. Mas ku 200 mion florin a keda desperdisio sin ainda por averiguá ken tabata esnan responsabel. Hopi memoria i dokumento a bai pèrdí. Te ainda…ta lokual a bini dilanti despues di tres dia den parlamento.

Pa e tardansa den un Enkuesta, no tin niun otro instansha pa kulpa sino Parlamento di Kòrsou mes, pa e debakel finansiero durante konstrukshon i transishon HNO. Atraves di aña, manera ta e kaso aktual, Parlamento di Kòrsou a keda latento sin reakshon kritiko riba e proyekto di 640 mion florin. E konstelashon parlamentario den pasado komo simplemente no a hasi nada pa lokual ta trata investigashon. Awor a bira definitivo ku Kòrsou su yunan i nietunan, lo paga un kuido médiko ku nan no por afòrt. Esaki pasobra  un biaha mas, e sistema parlamentario na Kòrsou no a funshoná. Lokual ta remarkabel den hinter e debakel den konstrukshon di e hospital nobo, ta durante kasi 10 aña, frakshonnan polítiko den Parlamento di Kòrsou a sostené e kuestionabilidat rondó di e pagonan mionario. No tabatin niun frakshon, ni esnan den pasado pero tampoko esnan presente ku a logra pone un investigashon riba mesa pa por apuntá ken tabata esnan responsabel pa e mal desishonnan.

Por ehèmpel, Berenschot a yega di kobra un suma di riba 1.2 mion florin pa inkorporashon di un direktor tékniko den e proyekto pa konstruí e hospital nobo. Despues di a paga “pa loko”, SONA mes a kuminsá kuestioná e tarifa pa orario ku Berenschot tabata kobra. Ta sospecha ku despues di e pagonan, SONA a bin realisá ku Berenschot tabata kobra entre 600 pa 800 florin pa kada ora. Esaki ta nifiká ku hasta SONA riba su mes a bin ripara ku e pagonan no tabata kuadra, miéntras parlamentarionan no a mustra niun klase di interes pa laga investigá.

For di algun di e tantísimo pagonan, ta trata dos, unu 280 mil i un otro  900 mil florin.  SONA a bin duda despues ku nan mes a ordená pa paga Berenschot. E pagonan aki tabata di buk den atministrashon pa alokashon di e hòmber Theo Janssen komo direktor di proyekto. Janssen a traha komo kordinadó tékniko di hospital te ku 2015. SONA despues di a bai investigá mas profundo a bin kai riba dos faktura grandi ku tabata relashoná ku un parti chikí dje trabounan di Janssen.  E kantidat di oranan kobrá a varia entre 1500 pa 1800. Berenschot a apliká un tarifa di 800 florin pa ora, lokual ta pafó dje kota normal ku ta kobra den proyektonan di konstrukshon. E kaso di Janssen ta konfirmá e sospechonan ku SONA tabata risibí sèn di gobièrnu i despues tabata paga Berenschot “pa loko” sin a tene kuenta ku kumplimentu di kòntròl atministrativo. E kompania di arkitekto i konseho, VK Architects a traha un konseho pa kibra ku e struktura di SONA/USONA e temporada ei.

Den korte a bin sali na kla despues ku SONA a paga miéntras Berenschot por ehèmpel den e kaso spesífiko aki, no a deskribí detayenan pa kual nan a manda kobra SONA. Ademas despues di a paga, SONA ta deskubrí tambe ku e tarifanan en kestion pa lokual ta trata e pago spesífiko di 1.2 mion, tabata mas haltu ku e tarifanan ku Berenschot a kobra den pasado pa mesun proyekto di HNO. Entre Berenschot i SONA tabatin bastante diskushon riba kobransa dje parti aki di trabou ku Janssen a ehersé.

SONA a simplemente tuma sèn serka gobièrnu di Kòrsou i paga Berenschot miónes sin responsabilidat atministrativo. Esei ta e problema di tur kos! Den e kaso di e fakturanan di Berenschot/Janssen por ehèmpel,  SONA mes no por spesifiká dikon nan por tabata pagando Berenschot riba tarifanan ku no tabata korespondiente. Por ehèmpel, Janssen a bandoná e proyekto for di 2015 pero tabata te na 2018 pa 2019 ku SONA realmente a kuminsá kuestioná  e pagonan. Mas tristu ainda, hasta internamente SONA mes no por responsabilisá e órden di pago. Parlamento di Kòrsou tabata kompletamente na soño i te ainda ta na soño.