Korte di apelashon a dikta ku e aanslagnan di impuesto ku ta relashoná ku añanan 2017 i anterior definitivamente no por wòrdu kobrá mas.

Punda– Korte di apelashon a dikta ku e aanslagnan di impuesto ku ta relashoná ku añanan 2017 i anterior definitivamente no por wòrdu kobrá mas.

Segun Gobiernu di Kòrsou, esaki a trese klaridat pa e debedónan di impuesto ku ta kai bou di e ‘kasonan eksepshonal’ publiká riba 3 di aprel 2023. Na komienso di e aña aki Ontvanger a disidí di limpia e datonan di kobransa. E magnitut di e datonan di kobransa a montoná i yega na un suma di NAf 5,7 miar, loke a pone ku e sistema a bira en realidat imposibel pa manehá. Pa e motibu aki un intervenshon drástiko tabata nesesario pa oumentá e efektividat di kobransa di impuesto i primanan.

Segun Ministerio di Finansas, pa añanan largu, a hiba un polítika di kobransa selektivo i a para inisiativanan pa oumentá e kumplimentu di impuesto prematuramente loke a kousa e situashon menshoná anteriormente. E aktual Minister di Finansa, Javier Silvania, a pone un fin na e kultura di ‘friends & family’ aki, i for di dia ku el a asumí su funshon, el a hinka hopi esfuerso pa mehorá e kumplimentu di impuesto. OECD, ku a ehekutá diferente investigashon internashonal riba efektividat di kobramentu di impuesto, a konkluí na 2019 ku e probabilidat di kobransa di aanslagnan ta baha lihé segun tempu ta transkurí. E konklushon aki ta konta pa Kòrsou tambe. Despues di 2 aña e chèns pa kobra un aanslag ta baha ku kasi 50%. Komo tal, aanslagnan relashoná ku 2017 i anterior mester a wòrdu kobrá hopi mas promé i no apénas na 2022 òf 2023. Pa por dirigí e energia di e aparato di kobrashon, di akuerdo ku e konklushonnan di OECD, prinsipalmente riba aanslagnan nobo ku tin un chèns mas grandi di kobransa, ontvanger a stòp di kobra aanslagnan ku ta relashoná ku añanan di impuesto 2017 i anterior. Ounke e intervenshon nesesario aki ta parse bastante riguroso, ta mustra ku e entrada di impuesto risibí raportá pa e aña aki ta hasta mas haltu ku na aña 2022, kaminda tabatin diferente entrada di impuesto pa un solo biaha.

For di momentu ku e gobièrnu aktual a sinta, a tuma pasonan grandi den Servisio di Impuesto, pa limpia e datonan di tantu Inspekshon di Impuesto komo Ontvanger. Pa e aña aki ainda tin diferente akshon planiá pa eliminá retrasonan atministrativo i pa mehorá ainda mas e kalidat di servisio di Servisio di Impuesto dor di outomatisashon i ánalisis di datonan. Den e próksimo lunanan lo tin algun kambio importante tambe den e efektividat di kobransa di impuesto i primanan. E añanan di ‘negligensia’ di Servisio di Impuesto ta kosta naturalmente e esfuerso nesesario pa drecha e daño ku a wòrdu kousá.