Bertie Braam: defensor sivil di CPR Holding.

Nieuwe Haven—Ayera korte a trata e di shete kaso sivil den afèr Caribbean Petroleum Refinery BV i Holding. E biaha aki e grupo venezolano a entamá un wisio tambe kontra di Kámara di Komersio, pa buska nan derechinan bek den registronan komersial na Punda.

E kaso di ayera ta trata un proseso a fondo, despues ku wes den wisio sumario a rechasá demanda di e grupo venezolano den CPR Holding. E tratamentunan ayera ta resultado di e promé kaso ku a tuma lugá fo’i un total di por lo ménos shete ku a yega dilanti mesa bèrdè den apénas 4 luna. E promé proseso a trata un proseso a fondo entamá pa eks sosionan di CPR BV, ku ta e grupo venezolano. Esaki ta un proseso pa e grupo venezolano por risibi tur akshon ku e yu di Kòrsou, Erchenel Doran tin den su poder. Ta trata di e grupo di Raul Socorro i su sosionan Marquez i Taborda, kendenan ta alegá ku Doran a kita nan poder for di e kompania ku tabatin derechi primario pa e destaho riba Refineria Isla. E mesun grupo na Yüni, a inisiá un wisio sumario tambe pa súplika korte a korto plaso duna nan akshonnan bek den CPR. E grupo di Socorro a keda ku kòntròl riba e Holding, pero Doran a keda ku kòntròl riba e BV ku ta e kompania mas importante den e proseso pa Refineria Isla. Den e wisio sumario, Korte no a yega na un desishon kombinsente i ta laga e akshonnan importante den man di Doran i referí grupo Socorro pa nan sigui den e proseso a fondo.

Abase di e desishon den wisio sumario, akshonistanan i eks direktornan den CPR Holding a inisiá un proseso sivil kontra di Kámara di Komersio. Den nan demanda nan a eksihí pa Kámara di Komersio, mediante eks direktor Erchenel Doran, inskribí nan bek komo direktornan na Curaçao Petroleum BV.CPR Holding representá pa Alejandro Marquez Bustos, Raul Socorro i Leonardo Taborda ke nan posishon bek. Tabata riba 14 Yüni 2022 na ofisina di notario Moerdijk a establesé a kompanianan Caribbean Petroleum Refinery Holding (CPR Holding) i Caribbean Petroleum Refinery BV. . A keda kumbiní pa emití i depositá un kantidat di 200 akshon. Partidonan a keda kumbiní pa deponé tur e akshonnan riba nòmber di e kompania ku a establesé, Doran Global Investments. Den e kompania menshoná, Erchenel Doran tabatin tur akshon i tabata úniko direktor.

A keda kumbiní tambe pa inskribí Marquez, Socorro i Doran komo direktor na CPR BV . Despues tambe a laga inskribí Luis Giusti komo direktor na CPR BV. Den e holding partidonan a kumbiní pa laga inskribí Doran, Giusti, Mouada Chaar Chaar i Billy Steblina komo direktornan. Despues ku e grupo tabata den proseso di bidding pa maneho na Refineria Isla, diferente iregularidat a kuminsá tuma lugá unda durante tratamentunan den Parlamento a bin sali na kla ku e.o. tabatin falsifikashon. Na Mart 2023, segun abogadonan di e grupo venezolano tabatin diferente reunion entre nan pa kumpra akshonnan di Doran Global Investments for di CPR Holding. Tabata e intenshon pa mantené solamente 2 akshonista den CPR Holding, Socap Corporation di Socorro i Business Security LLC di Marquez. Segun e grupo venezolano, a produsí e dokumentonan nesesario pero Echerel Doran nunka no a firma pa ofisialisá su salida for di e holding.

Riba 24 di mart 2023,  Marquez Socorro i Giusti a risibi un karta for di un kompania nobo, Birux Investments BV, ku nan no ta forma parti mas den maneho di CPR BV. AS bin resultá ku Birux ta un kompania 100% propietario di tur akshon den CPR BV i ta establesé for di 13 di yanüari 2023 pa Echerel Doran. E venezolanonan a pensa mesora e akshonnan di CPR Holding a keda traspasá pa Birux Investments. Esaki a lanta tur sospecho serka e grupo venezolano ku e traspaso di akshon pa Birux tabata ilegítimo. Tabata opvio tambe ku entre e grupo venezolano i Doran, ya no tabatin union mas.

Echerel Doran a tuma su mes retiro for di CPR Holding i registrá esaki den Kámara di Komersio, unda CPR Holding a keda konsiderá komo kompania deskontinuá. Den e kaso ei a sigui pa nombramentu ofisial di Socorro, Marquez i Taborda komo e direktornan di CPR Holding. Na momento nan a aserka Kámara di Komersio pa restablesé nan mes komo direktor na CPR Holding, Kámara di Komersio no a koperá.

Entretantu na Kámara di Komersio a pone hinter e file di CPR Holding “on hold” i fris tur modifikashon te na momento wes mester tuma un desishon. Socorro, Marquez i Taborda, a akudí na wes pa forsa Korte duna un veredikto unda Kámara di Komersio mester registrá nan bek komo direktornan na CPR.