Atento: un polis atento ta protehando e kriatura despues ku e la kai.

Seru Loraweg—Un famia ku ta biba riba Seru Loraweg a keda bastante troumá  na momento un kriatura di 2 aña a bin kai for di un altura di pro lo ménos 2 meter. Tabata den oranan di mainta lat ku sentral di polis a risibi notifikashon ku na un adrès riba Seru Loraweg, un aksidente mester a tuma lugá.

Mesora a despachá un unidat pa e adrès korespondiente. Na yegada e polisnan a bin konstatá ku un kriatura di 2 aña mester kai for di un altura di 2 meter. No tabatin muchu informashon na yegada kiko por a pasa, pero e kriatura lo tabata hungando riba un palapa di dos piso i aksidentalmente a bin kai for di ariba.

Mesora e patruya atento a manda yama ambulans pa duna tratamentu na e kriatura ku tabata drumí abou na suela. Bon trabou di polis a hasi tur lokual tabata nesesario pa protehá e kriatura i por a nota un funshonario di polis di buk ta tratando na kalma e situashon. Na yegada, personal di ambulans a tuma enkargo i kuminsá duna tratamentunan di promé ousilio. Mesora e personal di ambulans a kuminsá hasi e chekeonan básiko pa wak si e kriatura no a fraktura nada na su kurpa of si tabatin presensha di bludumentu.

Despues di hasi e chekeonan básiko, e personal di ambulans a kuminsá ku e transpòrt di e kriatura pa ambulans. Ku e ekiponan adekuá a logra sigurá e kriatura riba e kama pa hink’é den ambulans unda huntu ku miembro di famia a transporte pa CMC. No ta konosí kon su estado ta ni tampoko si e la keda hospitalisá pa mihó opservashon. Nos deseo di pronto rekuperashon ta bai pa famia di e kriatura.